మీటూ వేదికగా సినీరంగంలోని లైంగిక వేధింపులపై గళం విప్పి వార్తల్లో నిలిచింది గాయని, డబ్బింగ్ ఆర్టిస్ట్ చిన్మయి. ప్రముఖ గీత రచయిత వైరముత్తుపై ఆమె చేసిన ఆరోపణలు తమిళ చిత్రసీమలో ప్రకంపనలు సృష్టించాయి. తాజాగా వైరముత్తు విషయంలో చాలా జాగ్రత్తగా ఉండాలని, అతడిని ఒంటరిగా అస్సలు కలవొద్దు అంటూ యువ నటి అర్చనను హెచ్చరిస్తూ చిన్మయి చేసిన కామెంట్స్ ఇప్పుడు దక్షిణాది సినీ వర్గాల్లో హాట్టాపిక్గా మారాయి. వివరాల్లోకి వెళితే.. ‘రాజా రాణీ’ అనే సీరియల్తో తమిళనాట మంచి పాపులారిటీ సంపాదించుకుంది అర్చన. ప్రస్తుతం ఆమె సినిమాల్లోనూ నటిస్తున్నది. ఇటీవల అర్చన ఓ సినిమా షూటింగ్లో పాల్గొంది. అక్కడ సెట్లో వైరముత్తుతో తీయించుకున్న ఫొటోల్ని తన ఇన్స్టాగ్రామ్ ఖాతాలో పంచుకుంది. తానొక గొప్ప వ్యక్తిని కలిశానంటూ ఆనందం వ్యక్తం చేసింది. దీనిపై చిన్మయి స్పందించింది. వైరముత్తు తొలుత హుందాగా వ్యవహరిస్తూ గొప్ప వ్యక్తిగా కనిపిస్తాడని, ఆ తర్వాతే అసలు సమస్య మొదలవుతుందని చెప్పింది. అతడి విషయంలో చాలా జాగ్రత్తగా ఉండాలని, ఎవరూ తోడు లేకుండా ఒంటరిగా వెళ్లి ఎప్పుడూ కలవకూడదని సూచించింది.