Bigg boss Non stop | తెలుగు ప్రేక్షకులకు ఎంతో చేరువైన రియాలిటీ షో బిగ్ బాస్. ఒకప్పుడు కేవలం హిందీలోనే ఉన్న ఈ షో ఇప్పుడు తెలుగులోనూ బాగా పాపులర్ అయింది. మన దగ్గర ఐదు సీజన్లు విజయవంతంగా పూర్తయ్యాయి. ఇప్పుడు ఆరో సీజన్ కూడా మొదలవుతుంది. అయితే ఈసారి మాత్రం టీవీలో కాకుండా ఓటీటీలో దీన్ని మొదలు పెడుతున్నారు. హిందీలో ఇప్పటికే ఒకసారి ఈ ప్రయోగం చేశారు. అయితే అక్కడ బెడిసికొట్టింది. అయినా కూడా తెలుగులో బిగ్బాస్ ఓటీటీ మొదలవుతుంది. ఫిబ్రవరి 26 నుంచి మొదలు కానుంది. దీనికి సంబంధించిన అధికారిక ప్రోమో ఇప్పుడు బయటికి వచ్చింది.
ఇందులో నాగార్జున లాయర్గా కనిపించాడు. ప్రోమోను చాలా అద్భుతంగా డిజైన్ చేశారు నిర్వాహకులు. మురళీ శర్మ, వెన్నెల కిశోర్, నాగార్జున ఇందులో కీలక పాత్రల్లో నటించారు. నాగార్జున లాయర్ కాగా.. వెన్నెల కిశోర్ ఉరిశిక్ష పడ్డ ఖైదీ.. అలాగే పోలీస్ ఆఫీసర్గా మురళీ శర్మ కనిపించాడు. ఉరిశిక్ష పడ్డ ఖైదీని చివరి కోరిక ఏంటని అడిగితే.. బిగ్ బాస్ షో ఒక ఎపిసోడ్ చూడాలని ఉంది అంటూ కోరతాడు. ఒక గంట కదా అని పర్మిషన్ ఇస్తారు పోలీసులు. అయితే ఉదయం మొదలుపెట్టి రాత్రి వరకు చూస్తూనే ఉంటారు. వెన్నెల కిశోర్తో పాటు మిగిలిన వాళ్లు కూడా ఆయన పక్కన కూర్చుని బిగ్బాస్ షో ఎంజాయ్ చేస్తారు.
అప్పుడే నాగార్జున వచ్చి ఇక మీద గంట కాదు 24 గంటలు బిగ్బాస్ నాన్ స్టాప్ స్ట్రీమింగ్ మీ హాట్ స్టార్ డిస్నీలో వస్తుంది అని చెప్తాడు. బ్రేకులు లేకుండా 24 గంటలు బిగ్ బాస్ రాబోతుంది. ఎన్ని రోజులు ఈ షో ఉంటుంది అనేది మాత్రం క్లారిటీ ఇవ్వలేదు. ఇప్పటికే గత సీజన్లో పాల్గొన్న కంటెస్టెంట్స్ నే మరోసారి ఇందులోకి తీసుకొస్తున్నారు. టీవీలో వచ్చిన బిగ్బాస్ బాగానే సక్సెస్ అయింది. మరి డిజిటల్ మీడియాలో రానున్న 24/7 బిగ్ బాస్ షో ఏమవుతుందో చూడాలి.