పెళ్లి సంబంధాల కోసం ఓ ప్రవాస భారతీయ యువకుడు ఇండియాకు వస్తాడు. మనసును దోచే అమ్మాయి కోసం అన్వేషణ ఆరంభిస్తాడు. నచ్చిన చిన్నది తనకు దొరకదేమో అనుకునే తరుణంలో ఓ ముద్దుగుమ్మ తారసపడుతుంది. అయితే తనకు పూర్తి భిన్నమైన వ్యక్తిత్వం కలిగిన ఈ అమ్మడితో బ్యాచ్లర్ బాబుకు చిక్కులొచ్చిపడతాయి. అవేవిటో..ఈ జంట ప్రేమాయణం ఎలా సాగిందో తెలుసుకోవాలంటే మా సినిమా చూడాల్సిందే అంటున్నారు బొమ్మరిల్లు భాస్కర్. ఆయన దర్శకత్వంలో అఖిల్ అక్కినేని, పూజాహెగ్డే జంటగా నటిస్తున్న చిత్రం ‘మోస్ట్ ఎలిజిబుల్బ్యాచ్లర్’. బన్నీ వాసు, వాసువర్మ నిర్మాతలు. ఈ చిత్రాన్ని దసరా కానుకగా అక్టోబర్ 8న విడుదల చేయబోతున్నట్లు చిత్రబృందం తెలిపింది. ఈ సందర్భంగా కొత్త పోస్టర్ను విడుదల చేశారు. ఫీల్గుడ్ రొమాంటిక్ ఎంటర్టైనర్గా ఈ చిత్రాన్ని తెరకెక్కించామని నిర్మాతలు పేర్కొన్నారు. ఆమని, మురళీశర్మ, జయప్రకాష్, ప్రగతి తదితరులు నటిస్తున్న ఈ చిత్రానికి కెమెరా: ప్రదీశ్ ఎమ్ వర్మ, సంగీతం: గోపీసుందర్, నిర్మాణ సంస్థ: జీఏ2పిక్చర్స్, సమర్పణ: అల్లు అరవింద్, దర్శకుడు: బొమ్మరిల్లు భాస్కర్.