నా కెరీర్‌లో ప్రత్యేకం

గం గం గణేశా’ నా కెరీర్‌లో సరికొత్త ప్రయత్నం. ఈ సినిమాలో నేను పక్కింటి అబ్బాయిలా కనిపించను. హైపర్‌ ఎనర్జీతో నా క్యారెక్టర్‌ సాగుతుంది. క్రైమ్‌ కామెడీ కథాంశంతో ఆకట్టుకుంటుంది’ అన్నారు ఆనంద్‌ దేవరకొండ

“గం గం గణేశా’ నా కెరీర్‌లో సరికొత్త ప్రయత్నం. ఈ సినిమాలో నేను పక్కింటి అబ్బాయిలా కనిపించను. హైపర్‌ ఎనర్జీతో నా క్యారెక్టర్‌ సాగుతుంది. క్రైమ్‌ కామెడీ కథాంశంతో ఆకట్టుకుంటుంది’ అన్నారు ఆనంద్‌ దేవరకొండ. ఆయన హీరోగా నటిస్తున్న ఈ చిత్రానికి ఉదయ్‌శెట్టి దర్శకుడు. ఈ నెల 31న ప్రేక్షకుల ముందుకురానుంది. ఈ సందర్భంగా బుధవారం ఆనంద్‌ దేవరకొండ పాత్రికేయులతో పంచుకున్న సంగతులు..

• వినాయకుడి విగ్రహం చుట్టూ నడిచే కథ ఇది. ఆ విగ్రహాన్ని దక్కించుకోవడం కోసం కొందరు ప్రయత్నాలు చేస్తుంటారు. అసలు ఆ విగ్రహంలో ఏముంది? చివరకు అది ఎవరికి దక్కింది? అనే విషయాలు ఈ కథలో ఆసక్తినిరేకెత్తిస్తాయి. భయం, అత్యాశ, కుట్ర అనే మూడు అంశాల చుట్టూ నడిచే ఈ కథ ఆద్యంతం ఉత్కంఠను, వినోదాన్ని పంచుతుంది
• లాక్‌డౌన్‌ టైమ్‌లో దర్శకుడు ఉదయ్‌శెట్టి ఈ కథ చెప్పాడు. అనివార్య కారణాల వల్ల ఈ సినిమా షూటింగ్‌ ఆలస్యమవుతూ వచ్చింది. చాలా మంది నన్ను హీరో సెంట్రిక్‌ మూవీస్‌ ఎందుకు చేయడం లేదని అడుగుతుంటారు. ఈ సినిమాతో కొంత వరకు ఆ ప్రయత్నం నెరవేరింది. ఇందులో నా పాత్ర గత చిత్రాలకు పూర్తి భిన్నంగా అనిపిస్తుంది.
• ఏ హీరోకైనా స్పాన్‌ ఒక్కసారిగా పెరిగేది కాదు. ‘బేబీ’ వంద కోట్లు వసూలు చేసిందని నా తదుపరి చిత్రానికి ఇంకా ఎక్కువ కలెక్షన్స్‌ రావాలని అనుకోను. ఎందుకంటే ‘బేబీ’ యూనివర్సల్‌ లవ్‌ సబ్జెక్ట్‌ కాబట్టి ఆ స్థాయిలో వసూళ్లు సాధించింది. ‘గం గం గణేశా’ క్రైమ్‌ కామెడీ జోనర్‌. అందుకే రెండు చిత్రాలను పోల్చి చూడటం లేదు.
• రష్మిక మందన్న మా ఫ్యామిలీ ఫ్రెండ్‌. ప్రీరిలీజ్‌ ఫంక్షన్‌లో చిట్‌చాట్‌ వైరల్‌ కావాలనే చేశాం. నాకు పక్కా మాస్‌ యాక్షన్‌ మూవీస్‌ అంటే చాలా ఇష్టం. త్వరలో సితార ఎంటర్‌టైన్‌మెంట్‌ సంస్థలో అలాంటి కథతో సినిమా చేయబోతున్నా. వినోద్‌ దర్శకుడు. ‘బేబీ’ డైరెక్టర్‌ సాయిరాజేష్‌, నిర్మాత ఎస్‌కేఎన్‌ కాంబినేషన్‌లో ఓ సినిమా చేయబోతున్నా. స్టూడియో గ్రీన్‌ వారి ‘డ్యూయట్‌’ సినిమాలో నటిస్తున్నా.