Allu Arjun | సంధ్య థియేట‌ర్ తొక్కిసలాట కేసు .. చార్జిషీట్‌ను మరోసారి వెనక్కి పంపిన నాంపల్లి కోర్టు

Allu Arjun | హైదరాబాద్‌లో సంచలనం సృష్టించిన సంధ్యా థియేటర్ తొక్కిసలాట కేసులో పోలీసుల దర్యాప్తుకు మరోసారి అడ్డంకి ఎదురైంది. ఈ కేసులో పోలీసులు దాఖలు చేసిన చార్జిషీట్‌ను నాంపల్లి కోర్టు తిరిగి పంపింది. పలు సాంకేతిక మరియు విధానపరమైన లోపాలు ఉన్నాయని కోర్టు అభిప్రాయపడింది.

Allu Arjun | హైదరాబాద్‌లో సంచలనం సృష్టించిన సంధ్యా థియేటర్ తొక్కిసలాట కేసులో పోలీసుల దర్యాప్తుకు మరోసారి అడ్డంకి ఎదురైంది. ఈ కేసులో పోలీసులు దాఖలు చేసిన చార్జిషీట్‌ను నాంపల్లి కోర్టు తిరిగి పంపింది. పలు సాంకేతిక మరియు విధానపరమైన లోపాలు ఉన్నాయని కోర్టు అభిప్రాయపడింది. చార్జిషీట్‌కు సంబంధించిన కీలక ఆధార పత్రాలు పూర్తిగా జత చేయలేదని కోర్టు పేర్కొంది. ముఖ్యంగా డిజిటల్ సాక్ష్యాలు అయిన హార్డ్‌డిస్కులు, సీడీలు, పెన్‌డ్రైవ్‌లు సమర్పించలేదని స్పష్టం చేసింది. ఇలాంటి లోపాలు ఉన్నప్పుడు ఫైల్‌ను తిరిగి పంపడం సాధారణ న్యాయ ప్రక్రియలో భాగమని కోర్టు తెలిపింది.

2024 డిసెంబర్ 4న హైదరాబాద్‌లోని సంధ్యా థియేటర్‌లో పుష్ప 2 Pushpa 2: The Rule ప్రీమియర్ సందర్భంగా భారీగా అభిమానులు తరలివచ్చారు. ఈ సమయంలో జరిగిన గందరగోళంలో 35 ఏళ్ల రేవతి ప్రాణాలు కోల్పోయారు. ఆమె 9 ఏళ్ల కుమారుడు శ్రీతేజ్ తీవ్రంగా గాయపడి చికిత్స పొందాడు. ఈ ఘటనపై చిక్కడపల్లి పోలీస్ స్టేషన్‌లో కేసు నమోదు చేశారు. భద్రతా లోపాలు, జన నియంత్రణలో విఫలం, సాంకేతిక నిర్వహణలో తప్పులు వంటి ఆరోపణలు నమోదయ్యాయి. మొత్తం 23 మందిని చార్జిషీట్‌లో చేర్చారు. వారిలో నటుడు అల్లు అర్జున్, ప్రైవేట్ సెక్యూరిటీ సిబ్బంది, థియేటర్ యాజమాన్య ప్రతినిధులు ఉన్నారు.

దర్యాప్తు పూర్తయిందని పోలీసులు వెల్లడించినప్పటికీ, కోర్టు సూచించిన లోపాలను సరిగా సవరించకపోవడంతో చార్జిషీట్‌ను మరోసారి వెనక్కి పంపినట్టు సమాచారం. ఇదే కేసులో ఇది రెండోసారి కావడం గమనార్హం. గతంలో కూడా సాంకేతిక కారణాలతో ఫైల్ తిరస్కరించబడింది. అయితే అవసరమైన పత్రాలు, డిజిటల్ సాక్ష్యాలను జత చేసి మళ్లీ కోర్టుకు సమర్పించినట్టు పోలీసులు తెలిపారు. సవరించిన చార్జిషీట్‌పై కోర్టు త్వరలో విచారణ ప్రారంభించే అవకాశం ఉందని న్యాయ నిపుణులు అభిప్రాయపడుతున్నారు. రాష్ట్రవ్యాప్తంగా చర్చనీయాంశమైన ఈ ఘటనలో బాధిత కుటుంబానికి న్యాయం జరుగుతుందా? అన్న ప్రశ్నకు సమాధానం ఇప్పుడు కోర్టు తదుపరి చర్యలపై ఆధారపడి ఉంది.