Allari Naresh | మళ్లీ కామెడీ సినిమా.. హోమ్‌గ్రౌండ్‌లో ఆడినట్లుంది!: అల్లరి నరేష్‌

గత కొంతకాలంగా సీరియస్‌ సబ్జెక్ట్స్‌తో సినిమాలు చేస్తున్నానని, మరలా కామెడీ సినిమా చేయడ ఆనందంగా ఉందని చెప్పారు హీరో అల్లరి నరేష్‌. ఆయన తాజా చిత్రం ‘ఆ ఒక్కటీ అడక్కు’ ఈ నెల 3న ప్రేక్షకుల ముందుకురానుంది. మల్లి అంకం దర్శకుడిగా పరిచయమవుతున్న ఈ చిత్రాన్ని రాజీవ్‌ చిలకా నిర్మించారు. ఈ సందర్భంగా బుధవారం అల్లరి నరేష్‌ పాత్రికేయులతో పంచుకున్న విశేషాలు..

Allari Naresh | గత కొంతకాలంగా సీరియస్‌ సబ్జెక్ట్స్‌తో సినిమాలు చేస్తున్నానని, మరలా కామెడీ సినిమా చేయడ ఆనందంగా ఉందని చెప్పారు హీరో అల్లరి నరేష్‌. ఆయన తాజా చిత్రం ‘ఆ ఒక్కటీ అడక్కు’ ఈ నెల 3న ప్రేక్షకుల ముందుకురానుంది. మల్లి అంకం దర్శకుడిగా పరిచయమవుతున్న ఈ చిత్రాన్ని రాజీవ్‌ చిలకా నిర్మించారు. ఈ సందర్భంగా బుధవారం అల్లరి నరేష్‌ పాత్రికేయులతో పంచుకున్న విశేషాలు..

• ఈ చిత్రానికి నాన్నగారి సినిమా టైటిల్‌ పెట్టేసరికి పోలిక తీసుకొస్తారేమోనని కాస్త భయపడ్డాను. అయితే రెండు కథలకు ఎలాంటి సంబంధం ఉండదు. కథానుగుణంగా యాప్ట్‌ టైటిల్‌ దొరికింది. ఈ సినిమాలో హీరోకి ఏజ్‌బార్‌ అయినప్పటికీ పెళ్లి కాదు, అందరూ పెళ్లెప్పుడు? పప్పన్నం ఎప్పుడు పెడుతున్నావ్‌? అని అడుగుతుంటారు. ఆ చికాకులో చెప్పే డైలాగ్‌ ‘ఆ ఒక్కటీ అడక్కు’
• పెళ్లి నేపథ్యంలో నడిచే ఈ కథలో చక్కటి వినోదంతో పాటు సందేశం కూడా ఉంటుంది. పెళ్లి చుట్టూ జరుగుతున్న కోట్ల వ్యాపారం అనే అంశాన్ని వినోదాత్మక కోణంలో చూపిస్తున్నాం. ైక్లెమాక్స్‌ ఘట్టాలు మాత్రం భావోద్వేగభరితంగా సాగుతాయి.
• దర్శకుడు మల్లి నిజజీవితంలో జరుగుతున్న సంఘటనలను స్టడీ చేసి ఈ కథను సిద్ధం చేశాడు. కథలో సహజత్వం ఉంటుంది. పెళ్లి చుట్టూ జరిగే స్కామ్స్‌ను చూపించిన విధానం ఆలోచింపజేస్తుంది. అబ్బూరి రవి వంటి ప్రతిభావంతుడైన రచయిత తోడుకావడంతో ఈ సినిమాలో సంభాషణలు, ఎమోషన్స్‌ మరో స్థాయికి వెళ్లాయి.
• గత కొన్నేళ్లుగా సీరియస్‌ సబ్జెక్ట్స్‌తో సినిమాలు చేస్తున్నా. మళ్లీ కామెడీ సినిమా చేయడంతో హోమ్‌గ్రౌండ్‌లో ఆడినట్లు ఉంది. కామెడీకి గతంలో కంటే ఆదరణ పెరిగింది. వినోదాత్మక చిత్రాలకు ప్రేక్షకులు బ్రహ్మరథం పడుతున్నారు. నా దృష్టిలో కామెడీ చేసి నవ్వించడం చాలా కష్టం.
• ఈ ఏడాది సినిమాల వేగాన్ని పెంచాను. ఈ సినిమాతో పాటు ఈ ఏడాది మరో రెండు సినిమాలు రాబోతున్నాయి. ఈవీవీ బ్యానర్‌ను మళ్లీ మొదలుపెట్టే ఆలోచన ఉంది. మంచి కథ కుదిరితే ఆ బ్యానర్‌లో సినిమాలు చేస్తా. ప్రస్తుతం నటన మీదే దృష్టి పెడుతున్నా. దర్శకత్వం చేసే ఆలోచన లేదు.
• నాకు అన్ని జోనర్స్‌ సినిమాలు చేయాలని ఉంది. డార్క్‌ హ్యూమర్‌ ఉన్న కథలను బాగా ఇష్టపడతాను. ప్రేక్షకులు ఇప్పుడు కథలోంచి పుట్టే కామెడీనే బాగా ఇష్టపడతారు. నాకు వెంకటేష్‌గారితో ఓ సినిమా చేయాలని ఉంది. ఆయన కామెడీ టైమింగ్‌ సూపర్బ్‌. అమితాబ్‌బచ్చన్‌, కమల్‌హాసన్‌ వంటి లెజెండ్స్‌తో ఒక్క సీన్‌ అయినా షేర్‌ చేసుకోవాలనుంది.