Visit:
Akhanda 2 | నందమూరి బాలకృష్ణ ప్రధాన పాత్రలో బోయపాటి శ్రీను దర్శకత్వంలో తెరకెక్కిన ‘అఖండ 2’ మరో వారం రోజుల్లో ప్రేక్షకుల ముందుకు రానుంది. బాలయ్య ద్విపాత్రాభినయం, పవర్‌ఫుల్‌ డైలాగులు, యాక్షన్ ఎలిమెంట్స్ కలగలిపిన ఈ చిత్రంపై భారీ అంచనాలు నెలకొన్నాయి. సంయుక్త మీన‌న్ హీరోయిన్‌గా, ఆది పినిశెట్టి ప్రధాన ప్రతినాయకుడిగా నటిస్తుండగా, పూర్ణ కీలకపాత్రలో కనిపించనుంది. ఇప్పటికే విడుదలైన రెండు గ్లింప్స్ , ట్రైలర్‌ సినిమాపై బజ్‌ను మరింతగా పెంచాయి. అఘోర పాత్రలో బాలయ్య నటన, ఆధ్యాత్మికతతో కలిపిన పంచ్‌లైన్స్, హై ఇన్టెన్సిటీ యాక్షన్ సీన్స్‌ ఫ్యాన్స్‌ను ఉత్సాహపరుస్తున్నాయి.
తాజాగా ‘అఖండ 2 తాండవం’ పేరుతో మరో టీజర్‌ను చిత్రబృందం విడుదల చేసింది. మాస్‌ లెవెల్‌ను పెంచేలా రూపొందిన ఈ వీడియోలో బాలయ్య గెటప్స్‌, యాక్షన్ బ్లాక్స్‌, పవర్‌ఫుల్‌ డైలాగులు ఆద్యంతం ఆకట్టుకుంటున్నాయి. అభిమానులకు పూనకాలు తెప్పించేలా హై వోల్టేజ్‌ యాక్షన్‌ను చూపించారు. టీజర్‌ ప్రారంభంలో “భారత్‌ని కొట్టాలంటే… అక్కడి మూలాలను అడ్డం పెట్టుకొని కొట్టాలి” అని విలన్‌ చెబుతాడు. వెంటనే త్రిశూలంతో శివస్వరూపంలో బాలయ్య ఎంట్రీ ఇచ్చే సన్నివేశం విజువల్లీ అద్భుతంగా ఉంది. అఘోర లుక్‌లో కనిపించిన బాలయ్య.. “కొండల్లో తొండల్ని తిని బతికే మీరెక్కడ… ప్రతి కొండని క్షేత్రంగా మార్చి పూజించే మేమెక్కడ!” అంటూ పవర్‌ఫుల్‌గా చెప్పిన సీన్ చూసి ఫ్యాన్స్‌ పులకరించారు.
మరో సన్నివేశంలో గద పట్టుకుని బాలయ్య చేసే యాక్షన్, ఆ సమయంలో ఆకాశంలో కనిపించే హనుమంతుడు – ఈ కాంబినేషన్‌ టీజర్‌లో అద్భుతంగా నిలిచింది. ఆది పినిశెట్టి విలన్‌గా తన మాంత్రిక శక్తులతో విధ్వంసం సృష్టించే సీన్లు కూడా థ్రిల్లింగ్‌గా ఉన్నాయి. మొత్తానికి బాలయ్య అఘోర, శివుడు, సాధారణ నాయకుడు అనే మూడు గెటప్స్‌లో కనిపించడం కొత్త కుతూహలాన్ని రేపుతోంది. బాలకృష్ణ కుమార్తె తేజస్విని సమర్పణలో, 14 రీల్స్‌ ప్లస్‌ పతాకంపై రామ్‌ ఆచంట–గోపీ ఆచంట సంయుక్తంగా నిర్మించిన ఈ చిత్రాన్ని డిసెంబర్‌ 5న భారీ స్థాయిలో విడుదల చేస్తున్నారు. ఇది బాలయ్య కెరీర్‌లో తొలి పాన్‌–ఇండియా రిలీజ్‌ కావడం ప్రత్యేక ఆకర్షణగా మారింది.తెలుగుతో పాటు తమిళం, హిందీ, మలయాళం, కన్నడ భాషల్లో విడుదల కానున్న ‘అఖండ 2’ ప్రీ రిలీజ్‌ ఈవెంట్‌ను ఈ శుక్రవారం హైదరాబాద్‌లో గ్రాండ్‌గా నిర్వ‌హించారు.
