Visit:
Romanchakam | యువతను టార్గెట్ చేస్తూ తెరకెక్కిన రొమాంటిక్ కామెడీ డ్రామా ‘రోమాంచకం’ ఇప్పుడు ఓటీటీ ప్రేక్షకులను పలకరించేందుకు సిద్ధమైంది. సందీప్ రెడ్డి వంగా సమర్పణలో, ఆయన సోదరుడు ప్రణయ్ రెడ్డి వంగా నిర్మించిన ఈ సినిమా థియేటర్లలో ఆశించిన స్థాయిలో ప్రభావం చూపలేకపోయినప్పటికీ.. ఇప్పుడు డిజిటల్ వేదికపై కొత్త ప్రేక్షకులను అలరించేందుకు సిద్ధమైంది.. సుమంత్ ప్రభాస్, అనంతిక సనిల్కుమార్ ఈ సినిమాలో ప్రధాన జంటగా నటించారు. యువతకు సంబంధించిన ప్రేమ, వినోదం, సంబంధాల చుట్టూ సాగే కథాంశంతో రూపొందిన ఈ సినిమా థియేటర్లలో ప్రేక్షకుల ముందుకు వచ్చింది.
తాజాగా ‘రోమాంచకం’ ఓటీటీ విడుదల తేదీని నెట్ఫ్లిక్స్ అధికారికంగా ప్రకటించింది. అక్టోబర్ 1, 2026 నుంచి ఈ సినిమా నెట్ఫ్లిక్స్లో స్ట్రీమింగ్ కానుంది. థియేటర్లలో విడుదలైన తర్వాత డిజిటల్ ప్రేక్షకుల ముందుకు వస్తున్న ఈ చిత్రం ఓటీటీ ద్వారా ఎక్కువ మంది ప్రేక్షకులను చేరుకునే అవకాశం ఉంది. అయితే మరో ఆసక్తికరమైన విషయం ఏమిటంటే.. ‘రోమాంచకం’ కేవలం తెలుగులో మాత్రమే కాకుండా ఇతర భాషల్లో కూడా నెట్ఫ్లిక్స్లో అందుబాటులోకి రానుంది. దీంతో తెలుగు రాష్ట్రాలకు మాత్రమే పరిమితమైన ప్రేక్షకుల పరిధిని దాటి ఇతర ప్రాంతాల్లోనూ ఈ సినిమాను చూసే అవకాశం ఉంటుంది. ముఖ్యంగా యువతను ఆకట్టుకునే ప్రేమకథ, కామెడీ అంశాలు ఇతర భాషల ప్రేక్షకులకు ఎంతవరకు కనెక్ట్ అవుతాయన్నది ఆసక్తికరంగా మారింది.
థియేటర్లలో ‘రోమాంచకం’కు ఆశించిన స్థాయిలో స్పందన రాలేదనే టాక్ వినిపించింది. భారీ అంచనాలతో విడుదలైనప్పటికీ బాక్సాఫీస్ వద్ద సినిమా పెద్దగా ప్రభావం చూపలేకపోయింది. అయితే థియేటర్లలో ఫలితం ఎలా ఉన్నా.. ఓటీటీకి వచ్చిన తర్వాత కొన్ని సినిమాలకు కొత్త ప్రేక్షకులు దొరుకుతుంటారు. ముఖ్యంగా ఇంట్లోనే సులభంగా చూసే అవకాశం ఉండటంతో థియేటర్లలో మిస్ అయిన ప్రేక్షకులు ఓటీటీలో సినిమాను చూసే అవకాశం ఉంటుంది. ‘రొమాంచకం’ విషయంలోనూ ఇదే జరుగుతుందా? అనేది ఇప్పుడు చూడాలి. భద్రకాళి పిక్చర్స్ పతాకంపై ప్రణయ్ రెడ్డి వంగా ఈ చిత్రాన్ని నిర్మించగా, సందీప్ రెడ్డి వంగా ఈ చిత్రాన్ని సమర్పించారు. ఇప్పటికే ‘అర్జున్ రెడ్డి’, ‘కబీర్ సింగ్’, ‘యానిమల్’ వంటి చిత్రాలతో దర్శకుడిగా సందీప్ రెడ్డి వంగా తనకంటూ ప్రత్యేక గుర్తింపు తెచ్చుకున్న విషయం తెలిసిందే. ఈ నేపథ్యంలో ఆయన నిర్మాణ సంస్థ నుంచి వచ్చిన ‘రొమాంచకం’పై ఓటీటీ ప్రేక్షకుల్లో ఎలాంటి ఆసక్తి ఉంటుందన్నది చూడాల్సి ఉంది.
