Rekha boj | సామీ సామీ సాంగ్ కోసం రెండు గాజులు అమ్ముకున్న న‌టి..

November 20, 2021 / 09:28 PM IST

Rekha boj saami saami cover song | సినిమా అనేది ఒక రంగుల ప్ర‌పంచం.. ఇక్క‌డ ఎవ‌రికి ఎప్పుడు అవ‌కాశం వ‌స్తుందో చెప్పడం చాలా క‌ష్టం. ఇండ‌స్ట్రీకి వ‌చ్చిన వెంట‌నే కొంద‌రికి అవ‌కాశాలు వ‌స్తుంటాయి.. మ‌రికొంద‌రికి మాత్రం ఎన్నో ఏండ్లు నిరీక్షించిన స‌రైన ఛాన్స్ దొర‌క‌దు. అయినా స‌రే ఎలాగైనా ఇండ‌స్ట్రీ దృష్టిలో ప‌డేందుకు ర‌క‌ర‌కాల ప్ర‌య‌త్నాలు చేస్తుంటారు. అలాంటి వారిలో గుర్తింపు కోసం పాకులాడుతున్న సినీ న‌టి రేఖా భోజ్ కూడా ఒక‌రని చెప్పారు. సినిమాల్లో వేషాలు రాక‌పోయినా ఆత్మ‌స్థైర్యంతో ముందుకెళ్తూ.. స్వ‌త‌హాగా త‌న టాలెంట్‌ను నిరూపించుకుంటుంది. ఇందుకోసం సోష‌ల్ మీడియాను విప‌రీతంగా వాడేస్తోంది. ఈ క్ర‌మంలోనే పుష్ప సినిమాలో సామీ సామీ పాట‌కు స్టెప్పులేస్తూ ఒక క‌వ‌ర్ సాంగ్ తీసింది. ఇప్పుడు ఈ సాంగ్ వైర‌ల్‌గా మారింది.

సుకుమార్ ద‌ర్శ‌క‌త్వంలో అల్లు అర్జున్ న‌టిస్తున్న చిత్రం పుష్ప‌. ర‌ష్మిక మందన క‌థానాయిక‌. త్వ‌ర‌లో రిలీజ్ కానున్న ఈ సినిమా పాట‌లు ఇప్పుడు యూత్‌ను ఉర్ర‌త‌లూగిస్తుంది. ముఖ్యంగా మౌనిక యాద‌వ్ పాడిన సామీ సామీ పాట యూట్యూబ్‌లో ట్రెండింగ్‌గా మారింది. దీన్ని త‌న సెల్ఫ్ ప్ర‌మోష‌న్ కోసం వాడుకోవాల‌ని అనుకుంది రేఖా బోజ్‌. ఇందుకోసం సామీ సామీ పాట మీద ఒక క‌వ‌ర్ సాంగ్ చేసింది. ఇందులో వింతేముంది.. ఇవాళ రేపు చాలామంది క‌వ‌ర్ సాంగ్స్ చేస్తున్నారు క‌దా.. అని అనుకుంటున్నారు క‌దా ! అక్క‌డే అస‌లు విష‌యం ఉందండీ.. ఒరిజిన‌ల్ సాంగ్‌కు ధీటుగా ఉండాల‌ని ఈ సాంగ్ కోసం రేఖా బోజ్ ఎంత‌గానో క‌ష్ట‌ప‌డింది. స‌రిగ్గా సినిమాల్లో వాడిన త‌ర‌హా లొకేష‌న్ల‌నే సెలెక్ట్ చేసుకుంది. ఇక సాంగ్‌లో ర‌ష్మిక‌ను అచ్చంగా దించేసింది. క‌ట్టు బొట్టు మొత్తం ర‌ష్మిక‌లా త‌యారైంది. అయితే ఈ సాంగ్ చేయ‌డం కోసం ఆమె చాలానే ఇబ్బందులు ఎదుర్కొందంట‌. సాంగ్‌ షూట్ చేస్తున్న‌ప్పుడు వ‌ర్షం ప‌డినా లెక్కచేయ‌కుండా క‌ష్ట‌ప‌డిందంట‌. అంతేకాదు సామీ సామీ క‌వ‌ర్ సాంగ్ షూట్ చేసేందుకు త‌న రెండు బంగారు గాజుల‌ను కూడా అమ్ముకోవాల్సి వ‌చ్చింద‌ట‌. ఇదే విష‌యాన్ని సోష‌ల్ మీడియాలో చెప్పుకొచ్చిన రేఖా భోజ్‌.. త‌న సాంగ్ న‌చ్చితే సోష‌ల్ మీడియాలో షేర్ చేసి స‌పోర్ట్ చేయ‌మ‌ని కోరింది. ప్ర‌స్తుతం ఈ వీడియో, రేఖా భోజ్ పెట్టిన పోస్టు సోష‌ల్ మీడియాలో వైర‌ల్‌గా మారాయి.

రేఖా భోజ్‌ హీరోయిన్‌గా దామిని విల్లా, రంగేలా, క‌ళ్యాణ త‌స్మై న‌మ‌హః వంటి చిత్రాల్లో న‌టించింది. కానీ హీరోయిన్‌గా గుర్తింపు తెచ్చుకోలేక‌పోయింది. కానీ ఇప్పుడు సామీ సామీ క‌వ‌ర్ సాంగ్‌తో సోష‌ల్ మీడియాలో తెగ వైర‌ల్‌గా మారింది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి