Visit:
బాలీవుడ్ సినీ పరిశ్రమలో అసమానతల గురించి ఇటీవల కథానాయిక కృతి సనన్ మాట్లాడారు. ఈ క్రమంలో హీరోయిన్లు ఎదుర్కొంటున్న ఇబ్బందుల గురించి ఆమె చెబుతూ.. ‘సినిమా బడ్జెట్ పెరుగుదల విషయంలో నిర్మాతలు బాధపడటంలో అర్థం వుంది. కానీ దాన్ని నియంత్రించే క్రమంలో హీరోయిన్ల పారితోషికాలు తగ్గిస్తారు తప్ప, హీరోల పారితోషికాల జోలికి వెళ్లరు.
నిజానికి బడ్జెట్లో ఎక్కువ భాగం హీరో పారితోషికమే ఉంటుంది. కానీ బడ్జెట్ కంట్రోల్ని మా దగ్గర్నుంచే ప్రారంభిస్తారు. అంతేకాదు.. సెట్లోకి హీరో రాకముందే హీరోయిన్ రెడీగా ఉందా? లేదా? అని చూస్తారు. హీరోలను మాత్రం వెయిట్ చేయించరు.
ఈ ధోరణిలో మార్పు రావాల్సిన అవసరం ఎంతైనా ఉంది. నా కెరీర్ తొలినాళ్లలో నాతో నటించిన హీరోకు నా కంటే మంచి కారు ఇచ్చారు. నిజానికి అతను అప్పటికే నాకంటే జూనియర్. నేను కారు గురించి మాట్లాడటంలేదు. గౌరవం గురించి ప్రశ్నిస్తున్నా. హీరోలతో సమానమైన గౌరవాన్ని హీరోయిన్లు కాంక్షించడంలో తప్పులేదని నా ఉద్ధ్దేశ్యం’ అన్నారు కృతి సనన్.
