Aadarsha Kutumbam | ఆదర్శ కుటుంబం ట్విట్టర్ రివ్యూ.. వెంకీ కామెడీకి ప్రశంసలు, త్రివిక్రమ్ మ్యాజిక్ వర్కౌట్ అయిందా?

Aadarsha Kutumbam | విక్టరీ వెంకటేష్, దర్శకుడు త్రివిక్రమ్ శ్రీనివాస్ కలయికలో తెరకెక్కిన తాజా చిత్రం ‘ఆదర్శ కుటుంబం – హౌస్ నెం. 47’ ప్రేక్షకుల ముందుకు వచ్చింది. గతంలో వెంకటేష్ నటించిన ‘నువ్వు నాకు నచ్చావ్’, ‘మల్లీశ్వరి’ వంటి సినిమాలకు త్రివిక్రమ్ కథ, మాటలు అందించారు.

Aadarsha Kutumbam | విక్టరీ వెంకటేష్, దర్శకుడు త్రివిక్రమ్ శ్రీనివాస్ కలయికలో తెరకెక్కిన తాజా చిత్రం ‘ఆదర్శ కుటుంబం – హౌస్ నెం. 47’ ప్రేక్షకుల ముందుకు వచ్చింది. గతంలో వెంకటేష్ నటించిన ‘నువ్వు నాకు నచ్చావ్’, ‘మల్లీశ్వరి’ వంటి సినిమాలకు త్రివిక్రమ్ కథ, మాటలు అందించారు. దాదాపు రెండు దశాబ్దాల తర్వాత ఈ ఇద్దరూ కలిసి పనిచేయడంతో సినిమాపై మొదటి నుంచే భారీ అంచనాలు ఏర్పడ్డాయి. టీజర్, ట్రైలర్ కూడా ప్రేక్షకుల్లో ఆసక్తిని పెంచాయి. అక్టోబర్ 30న ప్రపంచవ్యాప్తంగా విడుదలైన ఈ సినిమాను చూసిన ప్రేక్షకులు సామాజిక మాధ్యమాల్లో తమ అభిప్రాయాలను పంచుకుంటున్నారు.

సినిమా తొలి భాగానికి ప్రేక్షకుల నుంచి మిశ్రమ స్పందన వస్తోంది. కథను పరిచయం చేసిన తర్వాత వెంకటేష్ తనదైన కామెడీ టైమింగ్‌తో సినిమాను ముందుకు తీసుకెళ్లారని పలువురు అభిప్రాయపడ్డారు. కుటుంబ సన్నివేశాల్లో హాస్యం, వెంకీ-శ్రీనిధి శెట్టి జంట, విలన్ పాత్రల పరిచయం ఆకట్టుకున్నాయని కొందరు పేర్కొన్నారు. కొన్ని కామెడీ సన్నివేశాలు బాగా నవ్వించగా, మరికొన్ని అంతగా పండలేదనే అభిప్రాయాలు కూడా వ్యక్తమయ్యాయి. ఇంటర్వెల్ బ్లాక్ మాత్రం బాగుందని, రెండో భాగంపై ఆసక్తిని పెంచిందని ప్రేక్షకులు అంటున్నారు. సెకండాఫ్ విషయంలో మాత్రం కొంత అసంతృప్తి వ్యక్తమవుతోంది. కథనం నెమ్మదించడం, కొన్ని సన్నివేశాలు సాగదీసినట్లుగా అనిపించడం సినిమాకు ప్రతికూలంగా మారాయని కొందరు నెటిజన్లు అభిప్రాయపడ్డారు.

కామెడీ కొన్ని చోట్ల బాగానే పండినా, మరికొన్ని సన్నివేశాల్లో బలవంతంగా ఇరికించినట్లు ఉందని కామెంట్లు చేశారు. అయితే స్క్రీన్‌ప్లే, కథాంశం కొత్తగా ఉన్నాయని, చివరి వరకు సినిమా ప్రేక్షకులను కొంతమేర కట్టిపడేస్తుందని మరికొందరు ప్రశంసించారు. ఈ సినిమాలో వెంకటేష్ నటన ప్రధాన ఆకర్షణగా నిలిచిందని ప్రేక్షకులు చెబుతున్నారు. తన ట్రేడ్‌మార్క్ కామెడీ టైమింగ్‌తో సన్నివేశాలను నిలబెట్టారని ప్రశంసిస్తున్నారు. సత్య కామెడీ నవ్వులు పూయించిందని, శ్రీనిధి శెట్టి పాత్రకు సంబంధించిన సన్నివేశాలు కూడా బాగున్నాయని అభిప్రాయపడ్డారు. త్రివిక్రమ్ సంభాషణలు, కొన్ని కుటుంబ సన్నివేశాలు ప్రేక్షకులను ఆకట్టుకున్నాయి. అయితే తమన్ సంగీతం మాత్రం ఆశించిన స్థాయిలో లేదని పలువురు కామెంట్లు చేశారు.

త్రివిక్రమ్ తనకు అలవాటైన కమర్షియల్ కథనంలో కొత్త తరహా హాస్యాన్ని జోడించే ప్రయత్నం చేశారని కొందరు నెటిజన్లు అభిప్రాయపడ్డారు. అయితే ఇలాంటి హాస్యాన్ని ప్రేక్షకులకు పూర్తిస్థాయిలో అందించాలంటే కథనం, సన్నివేశాల మధ్య మరింత స్పష్టత అవసరమని పేర్కొన్నారు. సినిమా కొన్ని మంచి ఆలోచనలతో మొదలైనా, వాటిని తెరపై పూర్తిస్థాయిలో ఆవిష్కరించలేకపోయిందనే అభిప్రాయాలు కూడా కనిపిస్తున్నాయి. కొందరు సినిమాను చూడొచ్చని అంటుంటే, మరికొందరు అంచనాలను పూర్తిగా అందుకోలేదని చెబుతున్నారు. మొత్తానికి వెంకీ, త్రివిక్రమ్ కాంబినేషన్‌పై ఉన్న భారీ అంచనాల నేపథ్యంలో ఈ సినిమాకు వస్తున్న స్పందన ఎలా బాక్సాఫీస్ ఫలితంగా మారుతుందో చూడాలి.