హోంలోన్ భారం వేగంగా క్లియ‌ర్ కావాలంటే..!

హోంలోన్ భారం ఇంటి రుణ చెల్లింపులు శ‌ర‌వేగంగా పూర్తి చేయాల‌ని భావిస్తున్నారా? నెల‌వారీ వాయిదాలు, వ‌డ్డీరేటు భారాన్ని త‌గ్గించుకోవాల‌ని భావిస్తున్నారా.. ...

April 9, 2021 / 08:13 PM IST

హోంలోన్ భారం వేగంగా క్లియ‌ర్ కావాలంటే..!

న్యూఢిల్లీ: మీరు ఇంటి రుణ చెల్లింపులు శ‌ర‌వేగంగా పూర్తి చేయాల‌ని భావిస్తున్నారా? నెల‌వారీ వాయిదాలు, వ‌డ్డీరేటు భారాన్ని త‌గ్గించుకోవాల‌ని భావిస్తున్నారా.. అయితే, అందుకో మార్గం ఉంది.

క‌రోనా రెండో వేవ్ కేసులు పెరుగుతున్న నేప‌థ్యంలో ఆర్థిక వ్య‌వ‌స్థ దెబ్బ తిన‌కుండా ఉండేందుకు ప్ర‌స్తుత ఆర్థిక సంవ‌త్స‌రం (2021-22) తొలి ద్వైవార్షిక ద్ర‌వ్య విధాన స‌మీక్ష‌లో కీల‌క వ‌డ్డీరేట్ల‌ను య‌థాత‌థంగా కొన‌సాగించాల‌ని ఆర్బీఐ నిర్ణ‌యించింది. రెపోరేట్ నాలుగు శాతంగా కొన‌సాగించాల‌ని తీర్మానించింది.

రెపోరేటు నాలుగు శాతానికి ప‌రిమితం కావ‌డంతో ప‌లు వాణిజ్య బ్యాంకులు అతి త‌క్కువ వ‌డ్డీరేటుపై ఇంటి రుణాలు మంజూరు చేస్తున్నాయి. అత్య‌ధిక బ్యాంకుల్లో ఇంటి రుణాలు ఏడు శాతం వ‌డ్డీరేటు వ‌ద్ద మొద‌ల‌వుతున్నాయి.

ఎంసీఎల్ఆర్‌-ఆర్ఎల్ఎల్ఆర్ ఆధారిత రుణాలిలా..

ఆర్బీఐ 2016 ఏప్రిల్ ఒక‌టో తేదీన మార్జిన‌ల్ కాస్ట్ ఆఫ్ లెండింగ్ రేట్ (ఎంసీఎల్ఆర్‌)ను ప్ర‌వేశ‌పెట్టింది. అన్ని రుణాల‌కు బేస్‌రేట్‌ను నిర్ధారిస్తూ వాణిజ్య బ్యాంకులు త‌మ‌ సొంత వ‌నరుల‌పై ఆధార‌ప‌డి మంజూరు చేసేవే ఎంసీఎల్ఆర్ రుణాలు.

ఎంసీఎల్ఆర్ కింద రుణాలు పొందిన రుణ‌గ్ర‌హీత‌ల‌కు ఆర్బీఐ ఖ‌రారు చేసే రెపోరేట్ ప్ర‌యోజ‌నాల‌ను రుణ గ్ర‌హీత‌ల‌కు చేర‌వేయ‌డంలో బ్యాంకులు జాప్యం చేసేవి.

దీని నివార‌ణ‌కు రెపోరేట్‌కు అ‌నుగుణంగా అన్ని బ్యాంకులు రుణాలు మంజూరు చేసేందుకు ఆర్బీఐ ఎక్స్‌ట‌ర్న‌ల్ బెంచ్‌మార్క్ లెండింగ్ రుణాల విధానం తెచ్చింది. 2019 అక్టోబ‌ర్ నుంచి అన్ని బ్యాంకులు ఇచ్చే రుణాల వ‌డ్డీరేట్ల‌ను ఫైనాన్సియ‌ల్ బెంచ్‌మార్క్ ఇండియా ప్రైవేట్ లిమిటెడ్ (ఎఫ్బీఐఎల్‌) ప్ర‌చురిస్తుంది.

ఎంసీఎల్ఆర్ లేదా రెపోలింక్డ్ లెండింగ్ రేట్ (ఆర్ఎల్ఎల్ఆర్‌)ల్లో దేని ప‌రిధిలోకి మీ రుణం వ‌స్తుంద‌న్న దాన్ని బ‌ట్టి మీరు వ‌డ్డీరేటును ఖ‌రారు చేసుకోవ‌చ్చు. నెల‌స‌రి వాయిదా భారాన్ని త‌గ్గించుకోవ‌చ్చు.

2019 ఏప్రిల్‌కు ముందు ఎంసీఎల్ఆర్ విధానం కింద ఇంటి రుణాలు పొందిన వారు ఆ ప‌ద్ద‌తిలోనే కొన‌సాగొచ్చు. అయితే, ఎంసీఎల్ఆర్ నుంచి ఆర్ఎల్ఎల్ఆర్‌కు మారితే రుణ గ్ర‌హీత‌ల భారం త‌గ్గుతుంది.

అయిన‌ప్ప‌టికీ ఎంసీఎల్ఆర్ రుణాలు తీసుకున్నా.. మీరు రుణం చెల్లించాల్సిన గ‌డువును బ‌ట్టి నెల‌వారీ వాయిదా చెల్లింపుల మొత్తం తగ్గించుకోవ‌చ్చు.

నెల‌వారీ వాయిదాల త‌గ్గింపు ఇలా

మీరు తీసుకున్న రుణాల‌పై ఒక్క‌శాతం వ‌డ్డీరేటు త‌గ్గినా చెల్లించాల్సిన నెల‌స‌రి రుణ వాయిదా త‌గ్గ‌డంతోపాటు మొత్తం వ‌డ్డీ భారం నుంచి బ‌య‌ట ప‌డొచ్చు. నూత‌న రుణాలు తీసుకున్న‌ప్పుడు మాత్ర‌మే త‌క్కువ వ‌డ్డీరేట్ల‌తో కూడిన లోన్ల కోసం వెళ్లొచ్చు.

వ‌డ్డీరేట్లు త‌గ్గించుకోవ‌డానికి మ‌రో మార్గం కూడా ఉంది. నిరంత‌ర (నిర్ధిష్ఠ‌) వాయిదాల్లో ముందస్తు చెల్లింపుల ద్వారా వ‌డ్డీరేట్ల భారం త‌గ్గించుకోవ‌చ్చు. ప్ర‌తి ఆరు నెల‌ల‌కోసారి లేదా ఏడాదికోసారి కొంత మొత్తం అద‌నంగా చెల్లించ‌డంతో మీరు చెల్లించాల్సిన మిగ‌తా రుణ భారం త‌గ్గుతుంది.

రుణాలు తీసుకున్న ప్రారంభంలోనే ముంద‌స్తు చెల్లింపులు చేస్తే బావుంటుంది. ప్రారంభంలో అధిక వ‌డ్డీరేటు అమ‌ల‌వుతున్న వారికి ముంద‌స్తు చెల్లింపుల వ‌ల్ల వ‌డ్డీ భారం త‌గ్గుతుంది.

రుణాలు కొత్త‌గా తీసుకునే వారు త‌ప్ప‌నిస‌రిగా ఆయా బ్యాంకుల్లో అందుబాటులో ఉన్న బెస్ట్ వ‌డ్డీరేట్ల‌ను త‌ప్ప‌నిస‌రిగా స‌మీక్షించుకోవాలి.

రెపోరేట్ పెరిగిన‌ప్పుడు ఎంసీఎల్ఆర్ విధానంలో లోన్ తీసుకున్న వారి కంటే ఆర్ఎల్ఎల్ఆర్ లింక్డ్ రుణాలు తీసుకున్న వారిపై ఎక్కువ ప్ర‌భావం ప‌డుతుంది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి