Union Budget | భారీగా పెరగనున్న పీవీసీ ఫ్లెక్స్‌ బ్యానర్‌ల ఖరీదు.. ఎందుకంటే..!

Union Budget | పండుగలొచ్చినా, ఎన్నికలొచ్చినా, గల్లీ నుంచి ఢిల్లీ దాకా ఏ స్థాయి నాయకుడి పుట్టిన రోజు వచ్చినా, అభిమాన హీరో సినిమా విడుదలైనా వీధుల్లో ఫ్లెక్సీలు వెలవాల్సిందే. నిలువెత్తు కటౌట్‌లు నిలవాల్సిందే.

Union Budget : పండుగలొచ్చినా, ఎన్నికలొచ్చినా, గల్లీ నుంచి ఢిల్లీ దాకా ఏ స్థాయి నాయకుడి పుట్టిన రోజు వచ్చినా, అభిమాన హీరో సినిమా విడుదలైనా వీధుల్లో ఫ్లెక్సీలు వెలవాల్సిందే. నిలువెత్తు కటౌట్‌లు నిలవాల్సిందే. అయితే ఇకపై తమ నాయకుల ఫొటోలతో భారీ ఫ్లెక్సీలు వేయించడం అంత అంత సులువు కాకపోవచ్చు. ఎందుకంటే పీవీసీ ఫ్లెక్స్‌ బ్యానర్స్‌ (PVC flex banners) పై కస్టమ్‌ ట్యాక్స్‌ను కేంద్ర సర్కారు అమాంతం పెంచేసింది.

పీవీసీ ఫ్లెక్స్‌ బ్యానర్స్‌పై ఇప్పటివరకు 10 శాతంగా ఉన్న బేసిక్‌ కస్టమ్ డ్యూటీ (BCD) ని కేంద్రం ఇప్పుడు 25 శాతానికి పెంచింది. ఇవాళ లోక్‌సభలో కేంద్ర బడ్జెట్‌ ప్రవేశపెట్టిన ఆర్థిక మంత్రి నిర్మలా సీతారామన్‌.. ఈ సందర్భంగా ఈ బేసిక్‌ కస్టమ్‌ డ్యూటీ పెంపు విషయాన్ని ప్రకటించారు. పీవీసీ ఫ్లెక్స్‌ బ్యానర్స్‌ అంత సులువుగా బయోడీగ్రేడ్‌ కావని, అవి పర్యావరణానికి, ప్రజల ఆరోగ్యానికి ప్రమాదకరమని, అందుకే వాటి దిగుమతులకు అడ్డుకట్టవేసేందుకు కస్టమ్‌ డ్యూటీని పెంచుతున్నామని నిర్మలా సీతారామన్‌ చెప్పారు.

పీవీసీ ఫ్లెక్స్‌ ప్రింట్‌ ధరపై ఏకంగా 25 శాతం కస్టమ్‌ డ్యూటీ పెరగడంతో ఇప్పుడు బ్యానర్‌ల ఖర్చు తడిసి మోపెడు కానుంది. ఈ ప్రభావం సినీ, రాజకీయ నాయకుల అభిమానులపైన మాత్రమే కాకుండా.. రాజకీయ నాయకులపైన, రాజకీయ పార్టీలపై కూడా పడనుంది.