SEBI on IIFL | అకౌంట్స్ నిర్వహణలో అవకతవకలకు పాల్పడిన ఇండియన్ ఇన్ఫోలైన్ లిమిటెడ్ (ఐఐఎఫ్ఎల్) సెక్యూరిటీస్కు స్టాక్ మార్కెట్ల నియంత్రణ సంస్థ.. సెబీ.. షాక్ ఇచ్చింది. వచ్చే రెండేండ్ల వరకు కొత్త ఖాతాదారులను చేర్చుకోవద్దని ఆంక్షలు విధించింది. ఖాతాల నిర్వహణలో నిబంధనలకు విరుద్ధంగా ఐఐఎఫ్ఎల్ వ్యవహరించినందునే ఈ నిర్ణయం తీసుకున్నట్లు సెబీ సోమవారం ఓ ప్రకటనలో వెల్లడించింది.
ఖాతాదారుల నిధులను సంస్థ నిధులతో కలపడం, డెబిట్ ఖాతాల పరిష్కారానికి క్రెడిట్ బ్యాలెన్స్ ఖాతాలను వాడుకోవడం, సంస్థ వ్యాపార నిధుల సమస్య పరిష్కారానికి క్రెడిట్ ఖాతాల వినియోగం వంటి చర్యలకు ఐఐఎఫ్ఎల్ పాల్పడింది. ఇది 1993లో తాము జారీ చేసిన సర్క్యులర్కు వ్యతిరేకం అని సెబీ వెల్లడించింది. 2011 ఏప్రిల్ నుంచి 2017 మార్చి నెలాఖరు వరకు ఐఐఎఫ్ఎల్ ఈ అవకతవకలకు పాల్పడినట్లు గుర్తించామని సెబీ పేర్కొంది. ఈ అవకతవకల వల్ల ఐఐఎఫ్ఎల్ దివాళా తీయకున్నా.. మార్కెట్ల నియంత్రణ సంస్థగా చర్యలు తీసుకోవాల్సిన బాధ్యత తమపై ఉందని సెబీ వివరించింది.
తనకు తాను అతిపెద్ద బ్రోకరేజీ సంస్థగా ప్రచారం చేసుకుంటూ వేలాది మంది రిటైల్ ఖాతాదారులతోపాటు కొన్ని సంస్థలకూ సేవలు అందిస్తామని ఐఐఎఫ్ఎల్ సెక్యూరిటీస్ చెబుతున్నదని సెబీ పేర్కొంది. నిబంధనలు పాటించకుండా ఖాతాల నిర్వహణలో అవకతవకలకు పాల్పడటంతోపాటు నిధులు దుర్వినియోగం చేసిందని తెలిపింది. ఇటువంటి చర్యలతో భారత ఆర్థిక వ్యవస్థకు నష్టం కలిగించవచ్చునని వివరించింది.