సంతోష్ ఈమధ్యే ఓ కారు కొన్నాడు. అనుకోకుండా అప్పుడే భారీ వర్షాలు కురిశాయి. అపార్ట్మెంట్ సెల్లార్లోకి నీళ్లొచ్చాయి. అక్కడే పెట్టిన కారు కూడా నీట మునిగింది.బీమా ఉందిలే అని ధీమాగా వర్షాలు తగ్గిన తర్వాత షోరూంకు వెళ్తే వాళ్ల సమాధానం విని ఆశ్చర్యపోయాడు. ఇంజిన్ మొత్తం పాడైపోవడంతో తన పాలసీకి ఇది వర్తించదని తేలింది. దీంతో లక్షలు ఖర్చుచేసి తానే బాగు చేయించుకోవాల్సి వచ్చింది. ఏటా భారీ వర్షాలు పడకపోవచ్చు.. మన ఇంట్లోకో, సెల్లార్లోకో లేక మనం ప్రయాణం చేస్తున్న రోడ్డు మీదకో కారు మునిగేంత నీరు రాకపోవచ్చు.. కానీ బీమా అనేది ఉంటే మనం ఎలాంటి టెన్షన్ పడాల్సిన అవసరం లేదు. ఎందుకంటే దానికి ఖర్చుచేసే మొత్తం చాలా తక్కువే అయినప్పటికీ అదిచ్చే ప్రశాంతత మాత్రం చాలా ఎక్కువే.
గ్లోబల్ వార్మింగ్ దృష్ట్యా వాతావరణ పరిస్థితులు పూర్తిగా మారాయి. అతివృష్టి, అనావృష్టి నేపథ్యంలో మనం మన జాగ్రత్తలు తప్పక తీసుకోవాల్సిందే. ముఖ్యంగా కార్ల వంటి ఖరీదైన వాహనాల విషయంలో బీమాకు సంబంధించిన ప్లాన్ ఉండాల్సిందే. సాధారణంగా స్టాండర్డ్ ఇన్సూరెన్స్ పాలసీ తీసుకుంటే ఏదైనా ప్రమాదం జరిగినప్పుడు మాత్రమే బీమా వర్తిస్తుంది. కాంప్రహెన్సివ్ కవరేజీ తీసుకున్నా ఆయిల్ లీకేజీ, నీళ్లు ఇంజిన్లోకి పోవడం వంటి ఘటనలకు బీమా కంపెనీలు కొన్ని పరిమితులు పెడుతున్నాయి. అందుకే స్టాండర్డ్ కాంప్రహెన్సివ్లతోపాటు కొన్ని యాడ్ ఆన్ కవర్స్ తీసుకోవడం వల్ల ప్రశాంతత పొందవచ్చు. ప్రీమియం బాగా తక్కువ అనే ఉద్దేశంతో కేవలం థర్డ్-పార్టీ ఇన్సూరెన్సులకు పరిమితం కావద్దు.ఇంజిన్ ప్రొటెక్షన్ కవరేజీ సమగ్ర బీమా పాలసీల్లో కూడా అధిక శాతం సంస్థలు ఇంజిన్ లేదా గేర్ బాక్సులకు ఇన్సూరెన్స్ కవరేజీని ఇవ్వవు. వర్షాకాలంలోనో, తుపాన్ల సమయమప్పుడో కారు ఇంజిన్లోకి పొరపాటున నీళ్లు వెళ్లి పాడైపోతున్న సందర్భాలను మనం చూస్తూనే ఉంటాం. అయితే బీమా ఉన్నా ఈ నష్టాలకు వర్తించబోదని తెలుసుకుంటే ప్రయోజనం ఉండబోదు. ఎందుకంటే ఇంజిన్ రిపేరీ ఖర్చు లక్షల్లో ఉంటుందని ప్రత్యేకించి చెప్పాల్సిన పనిలేదు.
ఏంటి పరిష్కారం?
కాంప్రహెన్సివ్ కవరేజీతోపాటు యాడ్ ఆన్స్ ముఖ్యంగా తీసుకోవాల్సి ఉంటుంది. మన పాలసీ డాక్యుమెంట్ చదివి అందులో ఇంజిన్ కవరేజీ లేకపోతే ఖచ్చితంగా ఉన్నదాన్నే తీసుకోవడం ఉత్తమం. అయితే ఇక్కడ మనం గుర్తుపెట్టుకోవాల్సినది ఏమిటంటే?.. కవరేజీ ఉంది కదా.. అని కావాలనే నీళ్లలోకి వెళ్లడం, నీళ్లలో మునిగి ఉన్న కారు ఇంజిన్ను స్టార్ట్ చేయడం వంటివి చేయొద్దు. ఇలాచేస్తే దీన్ని నిర్లక్ష్యంగా భావించి క్లెయిం తిరస్కరణకు గురయ్యే ప్రమాదం ఉన్నది.
రోడ్సైడ్ అసిస్టెన్స్ కూడా..
యాడ్ ఆన్ కవర్స్లో మరో రెండు ముఖ్యమైనవి రోడ్సైడ్ అసిస్టెన్స్, జీరో డిప్. వివిధ కారణాలతో ఒక్కోసారి మనం ప్రయాణించే వాహనం రోడ్డు మీదే ఆగిపోతూ ఉంటుంది. అలాంటప్పుడు దాన్ని దగ్గరున్న షోరూంకు టోయింగ్ చేసి తీసుకెళ్లడం, లేదా మరో వాహనాన్ని తెప్పించుకోవడం వంటి ప్రయోజనాలను మనం ఈ రోడ్సైడ్ అసిస్టెన్స్ యాడ్ ఆన్ కవర్ ద్వారా పొందే వీలుంటుంది. దీనికి ఏడాదికి గరిష్ఠంగా రూ.200-500 మధ్య చెల్లించాల్సి ఉంటుంది. ఇక జీరో డిప్రిసియేషన్ కవర్ కూడా మనకు పనికొచ్చేదే. సాధారణంగా ఏండ్లు గడిచేకొద్దీ మన వాహన విలువ లేదా విడిభాగాల విలువ తగ్గిపోతూ ఉంటుంది. వాటికి డిప్రిషియేటెడ్ విలువ మాత్రమే ఇస్తాయి బీమా సంస్థలు. ఏవైనా పార్ట్స్ మార్చుకోవాల్సి వచ్చినప్పుడు బీమా కంపెనీ ఇచ్చే డబ్బుతోపాటు మనం అధికంగా చేతి నుంచి పెట్టుకోవాల్సి ఉంటుంది. అలాంటప్పుడు మనం జీరో డిప్ యాడ్ ఆన్ తీసుకుంటే కలిసొస్తుంది.
-నాగేంద్ర సాయి కుందవరం
వర్షాకాలంలో పనికొచ్చే పాలసీ ఏది..
సాధారణ కారు ఇన్సూరెన్స్కు అదనంగా కొంత మొత్తాన్ని చెల్లించి వర్షాకాలంలో పనికొచ్చే పాలసీని తీసుకోవచ్చు. కారు ఐడీవీ (ఇన్సూరెన్స్ డిక్లేర్డ్ వాల్యూ)లో 0.15 నుంచి 0.2 శాతం వరకూ ఈ అదనపు చెల్లింపు ఉంటుంది. సంస్థనుబట్టి కొద్దిగా మారే అవకాశాలున్నాయని పాలసీ బజార్ మోటర్ ఇన్సూరెన్స్ రెన్యువల్స్ విభాగం అధిపతి అశ్వినీ దూబే చెప్పారు. అయితే తరచూ వరదలు వచ్చే ప్రాంతాల్లో ఉంటే ఇంజిన్ డ్యామేజీ రిస్క్ ఎక్కువగా ఉంటుంది. దీంతో వాళ్లు ఖచ్చితంగా యాడ్ ఆన్ తీసుకోవాలని ఆమె సూచించారు. అప్పుడు ఒకవేళ మన కారు దొంగతనానికి గురైనా లేక పూర్తిగా పనికిరాకుండా పాడైపోయినా బీమా సదుపాయం పొందవచ్చు.