RBL Bank | మెజారిటీ ప్రజానీకం అత్యవసరాల కోసం.. అనూహ్యంగా వచ్చే ఖర్చుల కోసం ఎమర్జెన్సీ ఫండ్ రూపంలో కొంత క్యాష్ చేతిలో ఉంచుకుంటారు. వివిధ బ్యాంకుల్లో సేవింగ్స్ ఖాతాల డిపాజిట్లపై వచ్చే వడ్డీ చాలా తక్కువ. అయినప్పటికీ కస్టమర్లు తమ ఖాతాల్లో డబ్బు నిల్వలు ఉంచేలా పలు బ్యాంకులు సేవింగ్స్ ఖాతా డిపాజిట్లపై అధిక వడ్డీరేటు ఇస్తున్నాయి. అటువంటి బ్యాంకుల్లో ఒకటి ఆర్బీఎల్ బ్యాంక్. సేవింగ్స్ ఖాతా డిపాజిట్లపై ఈ నెల ఐదో తేదీ నుంచి గరిష్ఠంగా 6.25 శాతం వడ్డీ ఆఫర్ చేస్తున్నది. ఖాతాదారులను ఆకర్షించడమే లక్ష్యంగా ఎన్ఆర్ఈ, ఎన్నార్వో సేవింగ్స్తో సహా అన్ని రకాల సేవింగ్స్ డిపాజిట్లపై సోమవారం నుంచి వడ్డీరేట్లు మారుస్తున్నట్లు ఆర్బీఎల్ బ్యాంక్ వెబ్సైట్ ప్రకటించింది.
రూ. లక్ష వరకు డిపాజిట్లపై వడ్డీరేట్ 4.25 శాతం యథాతథంగా కొనసాగుతుంది. రూ.లక్ష నుంచి రూ.10 లక్షల్లోపు డిపాజిట్లపై 5.50 శాతం, రూ.10 లక్షల నుంచి 25 లక్షల్లోపు డిపాజిట్లపై ఆరు శాతం, రూ.25 లక్షల నుంచి రూ.కోటి వరకు 6.25 శాతం వడ్డీ ఆఫర్ చేస్తున్నది. రూ.కోటి నుంచి రూ.5 కోట్ల వరకు 6.25 శాతం వడ్డీ ఇస్తున్నది. రూ.5 కోట్ల నుంచి రూ.7.5 కోట్ల డిపాజిట్లపై 5.75 నుంచి 6.25 శాతానికి వడ్డీ పెంచింది. రూ.10 కోట్ల నుంచి రూ.50 కోట్ల వరకు 6.10 శాతం వడ్డీ అందిస్తున్నది.
మూడు నెలలకోసారి సంబంధిత ఖాతాదారుల ఖాతాల్లో వడ్డీ జమ చేస్తామని ఆర్బీఎల్ బ్యాంక్ తెలిపింది. ప్రతియేటా జూన్ 30, సెప్టెంబర్ 30, డిసెంబర్ 31, మార్చి 31న వడ్డీని ఖాతాదారుల ఖాతాల్లో జమ చేస్తుంది. మూడు నెలల్లో ఆర్బీఐ కీలక రెపోరేట్ 140 బేసిక్ పాయింట్లు పెంచేసింది.