పైసలిస్తేనే నీళ్లు!
నగరంలో తాగునీటి దందా జోరుగా సాగుతున్నది. ఎల్నినో, వర్షాభావ పరిస్థితులు జలమండలి క్షేత్రస్థాయి సిబ్బందికి వరంగా మారాయి. సిటీలో నీళ్లు వదలాలంటే చేతులు తడపాల్సిందే అన్న చందంగా మారుతున్నాయి.
- క్షేత్రస్థాయి సిబ్బంది తాగునీటి దందా
- రూ.వేలల్లో లైన్మెన్ల వసూళ్లు
- దందాకు చిరునామాగా వెస్ట్ సిటీ
- అపార్ట్మెంట్లు, గేటెడ్ కమ్యూనిటీలకుగంటల తరబడి సరఫరా
- బస్తీలు, కాలనీలను వేధిస్తున్న లోప్రెషర్ సమస్యలు
- ఇప్పటికే అడుగంటిన భూగర్భ జలాలతో వట్టిపోతున్న బోర్లు
సిటీ బ్యూరో, నవంబర్ 21 (నమస్తే తెలంగాణ): నగరంలో తాగునీటి దందా జోరుగా సాగుతున్నది. ఎల్నినో, వర్షాభావ పరిస్థితులు జలమండలి క్షేత్రస్థాయి సిబ్బందికి వరంగా మారాయి. సిటీలో నీళ్లు వదలాలంటే చేతులు తడపాల్సిందే అన్న చందంగా మారుతున్నాయి. ప్రాంతాన్ని బట్టి, నీటి లభ్యతను బట్టి ఏరియాకో రేటు ఫిక్స్ చేసి వసూళ్లకు పాల్పడుతున్నారు. ముఖ్యంగా క్షేత్రస్థాయిలో నీటి సరఫరాను నిర్వర్తించే లైన్మెన్లు కాలనీలు, అపార్ట్మెంట్ల నివాసితుల దగ్గర వేలాది రూపాయలు తీసుకుంటూ గంటల కొద్దీ నీటిని సరఫరా చేస్తున్నారు. ఒక్కో ప్రాంతంలో ఒక్కోలాగా ఇంటి పరిమాణం, అపార్ట్మెంట్లలో ఉన్న ప్లాట్ల సంఖ్యను బట్టి ఒక కనెక్షన్కు రూ.
వెయ్యి నుంచి రూ.5 వేల దాకా వసూలు చేస్తున్నట్లు తెలుస్తున్నది. ముఖ్యంగా వెస్ట్ సిటీలో ఈ దందా మూడు పూవ్వులు ఆరు కాయలుగా సాగుతున్నది. గేటెడ్ కమ్యూనిటీలు, హైరైజ్డ్ భవనాలు, అపార్ట్మెంట్ల నుంచి ప్రతినెలా వేలల్లో తీసుకుని కావలసినన్ని నీళ్లు వదులుతున్నట్లు జోరుగా చర్చ జరుగుతున్నది. ఈ వసూళ్ల దందాలో లైన్మెన్ నుంచి మేనేజర్ స్థాయి దాకా జలమండలి ఉద్యోగులు భాగస్వామ్యులుగా ఉన్నట్లు ఉద్యోగులు చర్చించుకుంటున్నారు. డబ్బులు తీసుకుని నీళ్లన్నీ సంపన్నులకే సరఫరా చేస్తుండటంతో బస్తీలు, కాలనీల్లో నివసిస్తున్న పేద, మధ్య తరగతి ప్రజలకు నీళ్ల సమస్యలు తీవ్రమవుతున్నాయి. ఒకే ప్రాంతంలో ఉన్న అపార్ట్మెంట్లకు నీటి సమస్య లేకపోగా, పక్కనే ఉన్న బస్తీలకు నీళ్లు అందకపోవడం దీనికి నిదర్శనంగా నిలుస్తున్నది.
వసూళ్లకు వరప్రదాయనిగా వెస్ట్ సిటీ
జలమండలి పరిధిలో నీటి సమస్య తీవ్రంగా ఉండే ప్రాంతం వెస్ట్ సిటీ. ఇక్కడ సాధారణంగానే నీటి ఎద్దడి ఉంటుంది. ఎల్నినోతో దాని ప్రభావం రోజురోజుకు రెట్టిపు అవుతున్నది. ఈనేపథ్యంలో కోకాపేట, నార్సింగి, నానక్రాంగూడ, ఫైనాన్సియల్ డిస్ట్రిక్ట్, మాదాపూర్, కొండాపూర్, కొత్తగూడ, హైటెక్ సిటీ, కూకట్పల్లి, గచ్చిబౌలి, మియాపూర్, లింగంపల్లి, అమీన్పూర్, గోపన్పల్లి, తెల్లాపూర్ ప్రాంతాల్లో నీటి ఎద్దడి ఎప్పటికే తీవ్ర రూపం దాల్చింది. నీటి కటకట జలమండలి ఉద్యోగులకు వరదప్రదాయనిగా మారింది. ఆయా ప్రాంతాల్లో వందలాదిగా అపార్ట్మెంట్లు, గేటెడ్ కమ్యూనిటీలు ఉండటంతో దందా జోరుగా సాగుతున్నది. అపార్ట్మెంట్లకు నీటి సరఫరా తక్కువగా ఉంటుండటంతో అసోసియేషన్ ప్రతినిధులు లైన్మెన్ను సంప్రదించి ప్రతినెలా ఫ్లాట్లను బట్టి రూ.
10 వేల నుంచి రూ.50 వేల వరకు ఇచ్చేలా ఒప్పందం చేసుకుంటున్నట్లు తెలుస్తున్నది. ఇలా ఆ లైన్మెన్కు కేటాయించిన పరిధిలో ఎన్ని అపార్ట్మెంట్లు ఉన్నా అదే తరహాలో వసూలు చేస్తున్నట్లు అసోసియేషన్ సభ్యులే బహిరంగంగా చెప్తున్నారు. వెస్ట్ సిటీ వ్యాప్తంగా ఇదే తరహా దందా సాగుతున్నట్లు విశ్వసనీయంగా తెలుస్తున్నది. ఆ ప్రాంతానికి వెళ్లే నీళ్లన్నీ అపార్ట్మెంట్లకే సరఫరా అవుతుండటంతో బస్తీలు, కాలనీల ప్రజలు ఇక్కట్లు పడుతున్నారు. బోర్లు ఎండిపోయి, జలమండలి నీరు కనీసం అర్ధగంట కూడా రావడం లేదని వాపోతున్నారు. వచ్చిన కొద్ది సమయంలోనూ లోప్రెషర్ వేధిస్తున్నట్లు ఆవేదన వ్యక్తం చేస్తున్నారు.

వసూళ్లలో నీకింత.. నాకింత
వసూళ్ల దందాలో లైన్మెన్ నుంచి మేనేజర్, డీజీఎం దాకా భాగం అవుతున్నట్లు జలమండలి ఉద్యోగులు జోరుగా చర్చించుకుంటున్నారు. నీటి కరువు ఉన్న ప్రాంతాల్లో పనిచేసే ఉద్యోగులకు కాసుల పంట పండుతున్నదని బహిరంగంగానే మాట్లాడుకుంటున్నారు. అపార్ట్మెంట్లకు పరిమితికి మించి నీళ్లు వదలడంతో వచ్చిన డబ్బులో ప్రతి నెలా లైన్మెన్లు మేనేజర్ స్థాయి దాకా అందరికీ పంచుతున్నట్లు తెలుస్తున్నది. ఏరియాను బట్టి అపార్ట్మెంట్లు, హైరైజ్డ్ భవనాలు ఎక్కువగా ఉన్న ప్రాంతాల్లో పనిచేసే వాళ్లు కొంత ఫిక్స్డ్ అమౌంట్ ప్రతినెలా ఇచ్చేలా ఒప్పందాలు చేసుకున్నట్లు చర్చ జరుగుతున్నది.
ఈ దందా ఇలాగే కొనసాగితే రాబోయే రోజుల్లో సాధారణ ప్రజలు తీవ్ర నీటి ఎద్దడి ఎదుర్కొనే ప్రమాదం ఉంటుంది. ముందుగానే ఉన్నతాధికారులు క్షేత్రస్థాయిలో పర్యటించి వసూళ్ల దందా జరుగుతున్న ప్రాంతాలను గుర్తించి నిర్మూలించాలని వినియోగదారులు కోరుతున్నారు. అక్రమ వసూళ్లకు పాల్పడుతున్న సిబ్బందిని గుర్తించి చర్యలు తీసుకోవాలని డిమాండ్ చేస్తున్నారు. లేదంటే పేద, మధ్య తరగతి ప్రజలు తీవ్ర ఇబ్బందులు ఎదుర్కోవాల్సి వస్తుందని ఆవేదన వ్యక్తం చేస్తున్నారు.
Read Today's Latest Hyderabad News in Telugu and Telugu News
RELATED ARTICLES
తాజా వార్తలు
ట్రెండింగ్ వార్తలు
Watch: ఆసుపత్రిలో నిద్రిస్తున్న మహిళను వేధించిన వ్యక్తి.. తర్వాత ఏం జరిగిందంటే?
Watch: వైద్య విద్యార్థినిని.. కాలేజీ క్యాంపస్ నుంచి కిడ్నాప్ చేసిన కుటుంబ సభ్యులు, వీడియో వైరల్
Vande Bharat Train | బంధువులను సాగనంపేందుకు వందే భారత్ రైలు ఎక్కిన 12 మంది.. తర్వాత ఏం జరిగిందంటే?
Watch: హాస్పిటల్ యజమానిని బెదిరించి రూ.10 లక్షలు వసూలు.. కాంగ్రెస్ నేత అరెస్ట్, పార్టీ నుంచి బహిష్కరణ
Watch: ‘బ్యాగ్లో గంజాయి పెడతా.. డ్రగ్స్ కేసులో ఇరికిస్తా’.. జంటను బెదిరించిన పోలీస్ అధికారి

