Fixed Interest on Loans | ద్రవ్యోల్బణం వల్ల గత ఏడాది మే నుంచి పలు దఫాలు ఇంటి రుణాలపై వడ్డీరేట్లు.. తదనుగుణంగా ఇండ్ల రుణాలపై ఈఎంఐలు పెరిగాయి. ప్రస్తుతం వడ్డీరేట్లు కాస్త శాంతించినా.. మున్ముందు మళ్లీ పైపైకి దూసుకెళ్లే అవకాశాల్లేకపోలేదు. ఈ పరిస్థితుల్లో ఇండ్ల రుణ గ్రహీతలు ఫిక్స్డ్ వడ్డీరేటుకు మారితే ఎలా ఉంటుందని ఆలోచిస్తున్నారు. ఆర్బీఐ కూడా ఇటీవల వివిధ రుణాలు తీసుకున్న వ్యక్తులు ఫ్లోటింగ్ వడ్డీరేటు నుంచి ఫిక్స్డ్ వడ్డీరేటుకు మారేందుకు వెసులుబాటు కల్పించాలని బ్యాంకులకు సూచించింది. అయితే, ఫిక్స్డ్ లేదా ఫ్లోటింగ్ వడ్డీరేట్లతో సానుకూల ప్రతికూల పరిస్థితులు ఏమిటో తెలుసుకుందామా..
ఫిక్స్డ్ లేదా ఫ్లోటింగ్ వడ్డీరేట్లలో లాభాలూ, ఇబ్బందులు ఉంటాయి. రుణ గ్రహీత ఆర్థిక స్థితిగతులను బట్టి ఆధార పడి ఉంటుంది. ఫ్లోటింగ్ వడ్డీరేటు నుంచి ఫిక్స్డ్ వడ్డీరేటుకు మారాలనుకున్నప్పుడు వారి ఆర్థిక పరిస్థితిని గణణీయ స్థాయిలో ప్రభావితం చేస్తుంది. గతేడాది మే నుంచి పలు దఫాలుగా ఆర్బీఐ పెంచిన రెపోరేట్ 6.5 శాతం వద్ద వచ్చి నిలిచింది. మున్ముందు ద్రవ్యోల్బణాన్ని బట్టి వడ్డీరేట్లలో మార్పులు చోటు చేసుకునే అవకాశాలు ఉన్నాయి.
మున్ముందు వడ్డీరేట్లు పెరుగుతాయన్న అంచనాల నేపథ్యంలో ఇండ్ల రుణ గ్రహీతలు ఫ్లోటింగ్ వడ్డీరేటు నుంచి ఫిక్స్డ్ వడ్డీరేటుకు మారాలని భావించవచ్చు. అలా ఫిక్స్డ్ రేటుకు మారినప్పుడు నెలవారీగా చెల్లిస్తున్న ఈఎంఐ పెరగవచ్చు. అది మీ నెలవారీ బడ్జెట్ మీద ఎంత ప్రభావం చూపుతుందో అంచనా వేసుకున్నాకే.. అనుకూల పరిస్థితులు ఉన్నాయని నిర్ధారణకు వచ్చాకే ఫిక్స్డ్ వడ్డీరేట్లకు మారొచ్చు.
ఫ్లోటింగ్ వడ్డీరేట్ ఎంచుకుంటే వడ్డీరేటు హెచ్చుతగ్గులకు అనుగుణంగా ఈఎంఐ పెరగడం లేదా తగ్గడం ఉంటుంది. ఫిక్స్డ్ వడ్డీరేటు ఎంచుకుంటే ఈఎంఐ భారం ఒక్కసారే పెరుగుతుంది. వడ్డీరేట్లలో హెచ్చు తగ్గులు ఇష్టం లేని వారు ఫిక్స్డ్ వడ్డీరేట్ కు మారిపోవచ్చు.
వడ్డీరేట్లలో అనిశ్చితి నేపథ్యంలో రిటైర్మెంట్ తర్వాత కూడా రుణం కొనసాగేలా ఉంటే ఫిక్స్డ్ వడ్డీరేటుకే పరిమితం కావచ్చు. జాతీయ ఆర్థిక పరిస్థితులతోపాటు అంతర్జాతీయ పరిస్థితులు కూడా వడ్డీరేట్లలో మార్పులకు కారణం అవుతుంది. కనుక ఆయా పరిస్థితులతోపాటు వ్యక్తిగత ఆదాయ వనరులను పరిగణనలోకి తీసుకుని ఫిక్స్డ్ లేదా ఫ్లోటింగ్ వడ్డీరేట్లలో ఏదో ఒకటి ఎంచుకోవాలని ఆర్థిక నిపుణులు సూచిస్తున్నారు.