Nvidia | సీఈఓపై దర్యాప్తు ఎఫెక్ట్‌.. ఒక్కరోజులో ఎన్విడియా మార్కెట్‌ విలువ రూ.17 లక్షల కోట్లు ఆవిరి!

Nvidia | ప్రపంచంలోనే అత్యంత విలువైన టెక్‌ కంపెనీల్లో ఒకటైన ఎన్విడియాకు ఒక్కరోజులో భారీ నష్టం వాటిల్లింది. ఆ సంస్థ సీఈఓ జెన్సన్‌ హువాంగ్‌పై వచ్చిన ఆరోపణలతో అమెరికా స్టాక్‌ మార్కెట్‌లో సోమవారం ఎన్విడియా షేర్లు 4.27 శాతం పడిపోయాయి.

Nvidia | ప్రపంచంలోనే అత్యంత విలువైన టెక్‌ కంపెనీల్లో ఒకటైన ఎన్విడియాకు ఒక్కరోజులో భారీ నష్టం వాటిల్లింది. ఆ సంస్థ సీఈఓ జెన్సన్‌ హువాంగ్‌పై వచ్చిన వివాదాస్పద ఆరోపణలు, కంపెనీ బోర్డు ప్రారంభించిన అంతర్గత దర్యాప్తు ఇన్వెస్టర్లలో ఆందోళనకు కారణమయ్యాయి. దీంతో అమెరికా స్టాక్‌ మార్కెట్‌లో సోమవారం ఎన్విడియా షేర్లు 4.27 శాతం పడిపోయాయి. ఈ పతనంతో కంపెనీ మార్కెట్‌ విలువలో సుమారు 190 బిలియన్‌ డాలర్లు (రూ.17 లక్షల కోట్లకు పైగా) తగ్గిపోయింది. మార్కెట్‌ ముగిసే సమయానికి ఒక్కో షేరు ధర 7.97 డాలర్లు తగ్గి 178.67 డాలర్ల వద్ద స్థిరపడింది.

ఒక్కరోజులో 190 బిలియన్‌ డాలర్ల మార్కెట్‌ విలువ తగ్గుదల

శుక్రవారం ట్రేడింగ్‌ ముగిసే సమయానికి ఎన్విడియా మార్కెట్‌ విలువ సుమారు 4.5 ట్రిలియన్‌ డాలర్లుగా ఉంది. సోమవారం ట్రేడింగ్‌లో ఒక దశలో షేర్లు 7.5 శాతం వరకు పడిపోవడంతో కంపెనీ మార్కెట్‌ విలువ భారీగా తగ్గింది. రాయిటర్స్‌ నివేదిక ప్రకారం.. మార్కెట్‌ ముగిసే సమయానికి షేరు ధర 4.27 శాతం తగ్గి 178.67 డాలర్లకు చేరింది. దీంతో కంపెనీ మార్కెట్‌ విలువలో సుమారు 190 బిలియన్‌ డాలర్లు ఆవిరయ్యాయి. భారత కరెన్సీలో ఈ మొత్తం రూ.17 లక్షల కోట్లకు పైమాటే.

ఫోర్బ్స్‌ కుబేరుల జాబితాలోనూ రెండు స్థానాలు పతనం

ఎన్విడియా షేర్ల పతనం జెన్సన్‌ హువాంగ్‌ వ్యక్తిగత సంపదపైనా ప్రభావం చూపింది. ఫోర్బ్స్‌ రియల్‌టైమ్‌ బిలియనీర్స్‌ జాబితా ప్రకారం.. నవంబర్‌ 9న ఆయన సంపద 6.8 బిలియన్‌ డాలర్లు తగ్గి 155.4 బిలియన్‌ డాలర్లకు చేరింది. దీంతో ప్రపంచ కుబేరుల జాబితాలో ఎనిమిదో స్థానం నుంచి పదో స్థానానికి దిగజారారు. వారెన్‌ బఫెట్‌, లారీ ఎలిసన్‌ ఆయనను అధిగమించారు. హువాంగ్‌ సంపదలో ఎక్కువ భాగం ఎన్విడియాలో ఆయనకున్న 3.5 శాతానికి పైగా వాటా నుంచే వస్తోంది. అందుకే షేర్ల ధరలో మార్పులు ఆయన సంపదపై నేరుగా ప్రభావం చూపుతున్నాయి.

ఏఐ పెట్టుబడులపై సందేహాలూ కారణమేనా?

ఎన్విడియా షేర్లపై ఒత్తిడికి హువాంగ్‌ వ్యవహారంతో పాటు ఏఐ రంగంపై ఇన్వెస్టర్లలో పెరుగుతున్న ఆందోళనలు కూడా కారణమవుతున్నాయి. డేటా సెంటర్ల నిర్మాణం, విద్యుత్‌ వినియోగం, ఏఐ మౌలిక సదుపాయాలపై భారీగా పెట్టుబడులు పెట్టడం వల్ల ఆశించిన స్థాయిలో లాభాలు వస్తాయా? అనే సందేహాలు మార్కెట్‌లో ఉన్నాయి. మరోవైపు అమెరికా-చైనా మధ్య చిప్‌ ఎగుమతులపై ఆంక్షలు, నియంత్రణలు మరింత కఠినమయ్యే అవకాశం కూడా ఎన్విడియాకు సవాలుగా మారవచ్చని విశ్లేషకులు భావిస్తున్నారు.

ప్రస్తుతం కంపెనీకి సంబంధించిన దర్యాప్తు కొనసాగుతోంది. నవంబర్‌ 17న ఎన్విడియా త్రైమాసిక ఆర్థిక ఫలితాలు ప్రకటించనుంది. ఈ ఫలితాలతో పాటు దర్యాప్తులో వెలువడే అంశాలు కంపెనీ షేర్ల తదుపరి కదలికలను ప్రభావితం చేసే అవకాశం ఉంది.

వివాహేతర సంబంధం.. చైనా గూఢచర్యం ఆరోపణలు

చైనా గూఢచారిగా అనుమానిస్తున్న అలిస్‌ హువాంగ్‌తో తనకు వివాహేతర సంబంధం ఉందని ఎన్విడియా సీఈవో జెన్సెన్‌ హువాంగ్‌ అంగీకరించారు. అలిస్‌ జెన్సన్‌తో సన్నిహిత సంబంధం ఏర్పరచుకుని ఆ తర్వాత సున్నితమైన సమాచారాన్ని చైనాకు బదిలీ చేసినట్టు వార్తా కథనాలు చెప్తున్నాయి. ఈ వ్యవహారంపై హువాంగ్‌ తన ఉద్యోగులకు పంపిన సందేశంలో భార్య, పిల్లలను బాధపెట్టినందుకు విచారం వ్యక్తం చేసినట్లు సమాచారం. తాను చేసిన పనికి క్షమాపణలు చెబుతూ.. కంపెనీ దర్యాప్తునకు పూర్తిగా సహకరిస్తానని వెల్లడించినట్లు కథనాలు తెలిపాయి.

ఈ పరిణామాల నేపథ్యంలో ఎన్విడియా బోర్డు స్వతంత్ర డైరెక్టర్లు, బయటి న్యాయ నిపుణులతో కూడిన కమిటీ ద్వారా దర్యాప్తు చేపట్టింది. అయితే జాతీయ భద్రతకు లేదా ఎన్విడియా రహస్య సమాచారానికి ముప్పు వాటిల్లిందని భావించడానికి ఎలాంటి కారణాలు లేవని బోర్డు స్పష్టం చేసింది. హువాంగ్‌ నాయకత్వంపై తమకు విశ్వాసం ఉందని పేర్కొంది. చైనా విదేశాంగ శాఖ సైతం గూఢచర్య ఆరోపణలను ఖండించింది.