Fixed Deposits | ఎఫ్‌డీల్లో పెట్టుబడులు పెట్టనున్నారా.. అయితే స్వల్ప, దీర్ఘకాలిక డిపాజిట్లలో ఏది ఎంచుకోవాలి ?

ఫిక్స్‌డ్‌ డిపాజిట్‌ (ఎఫ్‌డీ)ను ఎంచుకునే ముందు డిపాజిట్‌ చేసే మొత్తం, వడ్డీరేట్లతోపాటు దాని కాలపరిమితి కూడా ప్రాధాన్యతాంశమే. స్వల్పకాలిక, దీర్ఘకాలిక ఎఫ్‌డీలు.. మీ రాబడులపైనేగాక, మీ ఆర్థిక లక్ష్యాలపైనా ప్రభావం చూపుతాయి.

Fixed Deposits | ఫిక్స్‌డ్‌ డిపాజిట్‌ (ఎఫ్‌డీ)ను ఎంచుకునే ముందు డిపాజిట్‌ చేసే మొత్తం, వడ్డీరేట్లతోపాటు దాని కాలపరిమితి కూడా ప్రాధాన్యతాంశమే. స్వల్పకాలిక, దీర్ఘకాలిక ఎఫ్‌డీలు.. మీ రాబడులపైనేగాక, మీ ఆర్థిక లక్ష్యాలపైనా ప్రభావం చూపుతాయి. ఉదాహరణకు దీర్ఘకాలిక ఎఫ్‌డీలతో అధిక ఆదాయం, మరింత ద్రవ్యలభ్యత చేకూరుతుంది. దీనివల్ల మీ ఆర్థిక లక్ష్యాలను సులువుగా సాధించవచ్చు. స్వల్పకాలిక ఎఫ్‌డీలతో తక్కువ సమయంలోనే మీ నిధుల్లో వృద్ధిని గమనించవచ్చు. సాధారణంగా ఇవి వారం రోజుల నుంచి రెండేండ్ల వరకుంటాయి. కనీస డిపాజిట్‌ మొత్తాలు తక్కువగా ఉండటం, మార్కెట్‌ లింక్డ్‌ రిస్కులు లేకపోవడం, స్వల్ప లాకిన్‌ పీరియడ్లు, పొదుపు ఖాతాల కంటే అధిక వడ్డీరేట్లు వీటి సొంతం.

దీర్ఘకాలిక ఎఫ్‌డీలు దాదాపు 2-10 ఏండ్ల వ్యవధితో ఉంటాయి. వీటి ప్లాన్లనుబట్టి అధిక వడ్డీరేట్లు, వృద్ధులకు ఎక్కువ రాబడి, రుణ సదుపాయం పొందే వీలు, పన్ను ప్రోత్సాహకాలుంటాయి. కాబట్టి మీ ఆర్థిక పరిస్థితి, నగదు అవకాశాల ఆధారంగా ఎఫ్‌డీ కాలపరిమితిపై ఓ నిర్ణయానికి రావడం ఉత్తమం. అయితే స్వల్పకాలిక ఎఫ్‌డీలకు వడ్డీరేట్లు మెరుగ్గా ఉండే వీలున్నది. బయట మార్కెట్లో లిక్విడిటీ సమస్యలున్నాయి. అంత సులువుగా రుణ లభ్యత లేదు. ఈజీ లోన్లకున్న మార్గాలనూ ఆర్బీఐ కఠినం చేస్తున్నది. బయటి మార్కెట్లో ఎంత సులభంగా లోన్లు లభిస్తే ద్రవ్యోల్బణం అంతగా పెరిగే అవకాశాలున్నాయి మరి. ఈ నేపథ్యంలో స్వల్పకాలిక ఎఫ్‌డీలు చేసేవారికి లాభదాయకంగానే పరిస్థితులుంటున్నాయి.