Cibil Score | నిత్యావసర వస్తువుల ధరలతోపాటు పెరిగిపోయిన ద్రవ్యోల్బణం కట్టడి చేయడానికి ఏడాది కాలంగా బ్యాంకులు రుణాలపై వడ్డీరేట్లు పెంచేశాయి. ప్రస్తుతం ద్రవ్యోల్బణం కాస్త ఉపశమించడంతో వడ్డీరేట్లు స్థిరంగా కొనసాగుతున్నాయి. అయినా ప్రస్తుత పరిస్థితుల్లో ఇండ్ల రుణాలు తీసుకున్న రుణ గ్రహీతలకు వెసులుబాటు కల్పించడానికి బ్యాంకులు, గ్రుహ రుణ సంస్థలు అవకాశాలు ఇస్తున్నాయి. రుణ గ్రహీత క్రెడిట్ స్కోర్ ఆధారంగా ఇండ్ల రుణాలపై వడ్డీరేటు తగ్గింపునకు ప్రాధాన్యం ఇస్తున్నాయి. కనుక మీరు బ్యాంకు రుణం తీసుకున్నా, తీసుకోవాలనుకున్నా, వడ్డీరేటు తగ్గించుకునేందుకు గల మార్గాలపై మీ ఖాతా గల బ్యాంకు అధికారులతో సంప్రదించడం బెటర్ అని ఆర్థిక నిపుణులు సూచిస్తున్నారు.
క్రెడిట్ స్కోర్ 750 పాయింట్ల కంటే ఎక్కువగా ఉంటే మీరు చక్కగా ఆర్థిక క్రమశిక్షణ పాటిస్తున్నారని అర్థం. ఆ క్రెడిట్ స్కోర్ మీరు ఇప్పటి వరకు చెల్లించిన పాత రుణాల వివరాలే చెబుతుంది తప్ప.. మీ ఆదాయం, దానిపై ఎంత రుణం తీసుకోవచ్చో చెప్పదు.
మీ సిబిల్ స్కోర్ 800 పాయింట్లు ఉంటే, కొత్త రుణాలివ్వడానికి బ్యాంకులు అభ్యంతరం వ్యక్తం చేయకపోవచ్చు. కానీ, మీ ఆదాయాన్ని బట్టే మీకు ఎంత రుణ అర్హత ఉందో బ్యాంకులు నిర్ణయిస్తాయి. దాన్ని బట్టే వడ్డీరేటు తగ్గింపుపై బేరసారాలు చేసే సామర్థ్యం లభిస్తుంది.
క్రెడిట్ కార్డు బిల్లుల చెల్లింపులు, వివిధ రుణాల ఈఎంఐ పేమెంట్స్, బీమా పాలసీ ప్రీమియం, పోస్ట్ పెయిడ్ ఫోన్ బిల్లులు సరైన టైంలో పే చేస్తేనే సిబిట్ స్కోర్ మీద ప్రభావం పడదు. సకాలంలో చెల్లించకపోతే సిబిల్ స్కోర్లో కోత పడుతుంది. క్రెడిట్ కార్డు బిల్లులు మొదలు రుణ వాయిదా పేమెంట్స్ ఆలస్యమయ్యే కొద్దీ తక్కువ వడ్డీపై రుణ లభ్యత అవకాశాలు తగ్గుతాయి.
మీరు ఏ రుణం తీసుకున్న మొత్తం ఆదాయంలో ఈఎంఐల వాటా 40 శాతం మించకుండా ఉండేలా చూసుకుంటే మంచిదని చెబుతున్నారు. ఇందుకోసం రుణం తీసుకునే వారు కనీసం మూడు నెలల ఈఎంఐ పేమెంట్స్కు అవసరమైన నిధి సమకూర్చుకుంటే.. చెల్లింపులకు సమస్యలు తలెత్తవు.
గతంతో పోలిస్తే ఇప్పుడు ఒకటి కంటే ఎక్కువ క్రెడిట్ కార్డులు ఉండటం సహజం. కానీ ఫస్ట్ టైం తీసుకున్న క్రెడిట్ కార్డు వాడుకుంటేనే బెటర్. దీనివల్ల క్రెడిట్ హిస్టరీ పెరుగుతుంది. సకాలంలో క్రెడిట్ బిల్లులు చెల్లించడంతో సిబిల్ స్కోర్ పెరిగి.. భవిష్యత్లో తీసుకునే రుణాలపై వడ్డీ తగ్గడానికి ఆస్కారం ఏర్పడుతుంది.
బ్యాంకులు, క్రెడిట్ కార్డు సంస్థలు, బ్యాంకింగేతర ఆర్థిక సంస్థలు రుణాలిస్తాం అని పంపే సందేశాలు ఓపెన్ చేసి ప్రాథమిక డిటైల్స్ సమర్పించినా లోన్ కోసం దరఖాస్తు చేసుకున్నట్లవుతుంది. దీనివల్ల మీ సిబిల్ స్కోర్ తగ్గిపోతుంది.
ఇతరుల రుణాలకు మీరు గ్యారెంటర్గా కొనసాగుతున్నారా.. ఇతరుల రుణానికి కో-అప్లికెంట్ గా ఉన్నారా.. అటువంటప్పుడు వారు సకాలంలో రుణం చెల్లించేలా చూసే బాధ్యత మీదే. వాయిదాలు సరిగ్గా చెల్లించకపోతే.. మీ క్రెడిట్ హిస్టరీలో ఆ విషయం నమోదై సిబిల్ స్కోర్ తగ్గిపోతుంది. కనుక రుణాలు తీసుకునే విషయంలో జాగ్రత్తగా ఉండాలంటూ ఆర్థిక నిపుణులు చెబుతున్నారు.
సకాలంలో ఈఎంఐలు పే చేస్తున్నా, కొన్ని సార్లు క్రెడిట్ నివేదికలో ఆ డిటైల్స్ నమోదు కాక సిబిల్ స్కోర్ తగ్గే అవకాశం ఉంది. కనుక అధిక రుణాలు, క్రెడిట్ కార్డులు గల వారు ప్రతి ఆరు నెలలకోసారైనా మీ సిబిల్ స్కోర్, క్రెడిట్ హిస్టరీ చెక్ చేసుకోవాలని, తప్పొప్పులను సరి చేసుకోవాలని ఆర్థిక నిపుణులు సూచిస్తున్నారు.