PMAY Scheme | ఇల్లు కొంటున్నారా?.. పీఎంఏవై పథకంలో వడ్డీ రాయితీ పొందండిలా

ప్రధాన మంత్రి ఆవాస్‌ యోజన (పీఎంఏవై) పథకం మళ్లీ వచ్చింది. ఈ ఆర్థిక సంవత్సరానికి (2024 -25)గాను గత నెల పార్లమెంట్‌లో కేంద్ర ఆర్థిక శాఖ మంత్రి నిర్మలా సీతారామన్‌ ప్రకటించిన బడ్జెట్‌లో దీన్ని తిరిగి తీసుకొచ్చారు.

PMAY Scheme | ప్రధాన మంత్రి ఆవాస్‌ యోజన (పీఎంఏవై) పథకం మళ్లీ వచ్చింది. ఈ ఆర్థిక సంవత్సరానికి (2024 -25)గాను గత నెల పార్లమెంట్‌లో కేంద్ర ఆర్థిక శాఖ మంత్రి నిర్మలా సీతారామన్‌ ప్రకటించిన బడ్జెట్‌లో దీన్ని తిరిగి తీసుకొచ్చారు.

ఏమిటీ పీఎంఏవై?

ఈ పథకం 2015లో మొదలైంది. దేశంలోని అన్ని గ్రామీణ, పట్టణ, నగర ప్రాంతాల్లోని పేద, మధ్యతరగతి వర్గాలకు పక్కా గృహాలు, కనీస వసతుల్ని కల్పించడమే ఈ క్రెడిట్‌ లింక్డ్‌ సబ్సిడీ స్కీం లక్ష్యం. అర్హులైన లబ్ధిదారులకు ఇండ్ల నిర్మాణం కోసం ఇందులో పీఎంఏవై-గ్రామీణ్‌, పీఎంఏవై-అర్బన్‌ పేరిట రెండు విభాగాలున్నాయి. ఇంటి నిర్మాణం, కొనుగోలు కోసం తీసుకునే రుణాలపై చెల్లించే వడ్డీలో రాయితీ ప్రయోజనాన్ని పీఎంఏవై అందిస్తుంది.

ఎవరు అర్హులు?

• వార్షిక ఆదాయం రూ.3 లక్షలదాకా ఉన్న ఆర్థికంగా వెనుకబడిన తరగతులవారు.
• రూ.3-6 లక్షల మధ్య వార్షిక ఆదాయం ఉన్న అల్పాదాయ వర్గాలు.
• రూ.6-12 లక్షల మధ్య వార్షిక ఆదాయం ఉన్న మధ్యతరగతి ప్రజానీకం.
• రూ.12-18 లక్షల మధ్య వార్షిక ఆదాయం ఉన్న ఎగువ మధ్యతరగతి కుటుంబాలు.
• పీఎంఏవై దరఖాస్తుదారులు భారతీయులై ఉండాలి. దేశంలో మరెక్కడా వారికి సొంతిల్లు ఉండరాదు.
• కేంద్ర ప్రభుత్వం ద్వారా మరే ఇతర గృహ సంబంధిత పథకాల ప్రయోజనాలను గతంలో పొంది ఉండకూడదు.

ఇదీ సంగతి..

• నిర్ణీత వైశాల్యాల్లోని నివాసాలకే పథకం.
• మహిళలకు తక్కువ వడ్డీరేటుకే రుణాలు.
• రుణం ఎంత మొత్తమైనా తీసుకోవచ్చు. కానీ ఈ పథకం ప్రయోజనం సదరు రుణ మొత్తంలో రూ.12 లక్షల వరకే వర్తిస్తుంది.
• గరిష్ఠంగా రూ.2.67 లక్షలదాకా సబ్సిడీ.
• ఇల్లు పూర్తిగా మహిళ పేరిటగానీ, లేదా సహ యజమానిగానైనా స్త్రీలుండాలి.
• స్టాంప్‌ డ్యూటీ తగ్గింపు, పన్ను మినహాయింపులు, రిజిస్ట్రేషన్‌ చార్జీల్లో కోతలు.
• మహిళలకు రుణంపై రూ.1.5 లక్షలదాకా, వడ్డీపై రూ.2 లక్షల వరకు పన్ను మినహాయింపు. దంపతులిరువురికీ ఆదాయం ఉన్నైట్టెతే ఈ ప్రయోజనం రూ.3 లక్షలు, రూ.4 లక్షలదాకా ఉండటం విశేషం.

దరఖాస్తు ఇలా..

ఆన్‌లైన్‌లోనైతే అర్హులు తొలుత పీఎంఏవై అధికారిక వెబ్‌సైట్‌కు వెళ్లాలి. ఆపై ‘సిటిజన్‌ అసెస్‌మెంట్‌’, ‘బెనిఫిట్స్‌ అండర్‌ అదర్‌ 3 కాంపోనెంట్స్‌’లపై క్లిక్‌ చేయాలి. ఆ తర్వాత ఆధార్‌ వివరాలిస్తే దరఖాస్తు ఫారం వస్తుంది. అందులో అన్ని వివరాలను నింపితే సెక్యూరిటీ క్యాప్చా వస్తుంది. దాన్ని పూర్తిచేసి ‘సేవ్‌’ చేస్తే అప్లికేషన్‌ నెంబర్‌ వస్తుంది. దీన్ని భవిష్యత్తు అవసరాలకు రెఫరెన్స్‌గా తీసుకోవాలి. ఆఫ్‌లైన్‌లోనైతే.. ఎస్బీఐ, ఇతర పీఎంఏవై పథకం వర్తించే బ్యాంకులు, ఆర్థిక సంస్థలను సంప్రదించాలి. ఆదాయ ధ్రువీకరణ, కావాల్సిన డాక్యుమెంట్లు చూపించి ఆమోదం పొందవచ్చు. ఆపై సబ్సిడీ వడ్డీరేటుపై ఇంటి కొనుగోలు ప్రక్రియలోకి దిగవచ్చు.