EPFO | 2014 సెప్టెంబర్‌కు ముందు రిటైరీలకు షాక్‌.. అధిక పెన్షన్‌కు అనర్హులయ్యే అవకాశం

వాస్తవ వేతనంపై పీఎఫ్‌ చెల్లింపులు చేసిన వారికి అధిక పెన్షన్‌ ఇవ్వాలంటూ సుప్రీం కోర్టు ఆదేశాలు ఇచ్చిన తర్వాత వేతన జీవులపై ఎంప్లాయీస్‌ ప్రావిడెంట్‌ ఫండ్‌ ఆర్గనైజేషన్‌ (ఈపీఎఫ్‌వో) వరుస పిడుగులు వేస్తున్నది.

• అధిక పెన్షన్‌కు అనర్హులయ్యే అవకాశం: ఈపీఎఫ్‌వో

న్యూఢిల్లీ, మార్చి 7: వాస్తవ వేతనంపై పీఎఫ్‌ చెల్లింపులు చేసిన వారికి అధిక పెన్షన్‌ ఇవ్వాలంటూ సుప్రీం కోర్టు ఆదేశాలు ఇచ్చిన తర్వాత వేతన జీవులపై ఎంప్లాయీస్‌ ప్రావిడెంట్‌ ఫండ్‌ ఆర్గనైజేషన్‌ (ఈపీఎఫ్‌వో) వరుస పిడుగులు వేస్తున్నది. ఎనిమిదేండ్ల క్రితమే పదవీ విరమణ చేసి, సుప్రీం తీర్పుతో ఎక్కువ పెన్షన్‌ వస్తుందన్న వస్తుందన్న వృద్ధ ఆశాజీవులనూ సంస్థ వదలడం లేదు. 2014 సెప్టెంబర్‌ 1కంటే ముందు రిటైర్‌ అయినవారిలో అధిక శాతంమందిని ఎక్కువ పెన్షన్‌కు అనర్హులను చేసే రీతిలో ఉన్న నిబంధనలు తాజాగా బయటపడ్డాయి. సుప్రీం కోర్టు తీర్పును అనుసరించి 2014 సెప్టెంబర్‌ కంటే ముందు పదవీ విరమణ చేసినవారు అధిక పెన్షన్‌కు దరఖాస్తు చేసుకోవడానికి ఈ మార్చి 4 గడువుతేదీ కాగా, ఈ తేదీనాటికి 91,259 ఆన్‌లైన్‌ అప్లికేషన్లు వచ్చినట్టు కేంద్ర కార్మిక మంత్రిత్వ శాఖ రెండు రోజుల క్రితం ప్రకటించింది. వీరిలో ఎక్కువ మంది అధిక పెన్షన్‌కు అనర్హుల వుతారని నిపుణులు అంటున్నారు. ఈ మేరకు సమాచార హక్కు చట్టం కింద ఆంగ్ల దినపత్రిక టైమ్స్‌ ఆఫ్‌ ఇండియాకు లభించిన సమాచారంలో విస్తుపోయే వాస్తవం వెల్లడయ్యింది. అది ఏమిటంటే..

• ఎంప్లాయీస్‌ పెన్షన్‌ స్కీమ్‌ (ఈపీఎస్‌) సభ్యులు వాస్తవ వేతనంపై పెన్షన్‌ ఫండ్‌కు చెల్లింపు, తద్వారా అధిక పెన్షన్‌ కోరుతూ ఉమ్మడి ఆప్షన్‌ (ఉద్యోగి, యజమాని కలిసి) సమర్పించడానికి 2004 డిసెంబర్‌ 1 కట్‌ ఆఫ్‌ తేదీగా అప్పట్లో ఈపీఎఫ్‌వో నోటీఫై చేసింది.
• అటుతర్వాత పెన్షన్‌ ఫండ్‌కు అధిక వేతనంపై యాజమానులు జరిపే చెల్లింపుల్ని స్వీకరించడం నిలిపివేసింది. ఈ విషయాన్ని 2006 నవంబర్‌ 11న ఈపీఎఫ్‌వో జారీచేసిన ఒక సర్క్యులర్‌లో స్పష్టంచేసింది.
• ఈ కారణంగా అధిక పెన్షన్‌కు ఆప్ట్‌ చేయాలనుకున్న ఈపీఎస్‌ సభ్యులు సర్వీసులో ఉన్నపుడు ఈపీఎస్‌ పేరా 11(3) కింద ఉమ్మడి ఆప్షన్‌ను సమర్పించలేకపోయారు.
• 2006 నవంబర్‌ 22న ఈపీఎఫ్‌వో జారీచేసిన మరో సర్క్యులర్‌లో ‘ఈపీఎస్‌ స్కీమ్‌ పేరా 11(3) కింద కాకుండా కేవలం ఈపీఎఫ్‌ స్కీమ్‌ పేరా 26(6) కింద చట్టబద్ధ పెన్షన్‌బుల్‌ వేతన పరిమితికి మించి వాస్తవ జీతంపై పెన్షన్‌ ఫండ్‌ కు చెల్లింపు చేసుకునే ఆప్షన్‌ సభ్యులకు అందుబాటులో ఉంది’ అన్నది. అలాగే పేరా 11(3) అనేది పెన్షన్‌బుల్‌ వేతనాన్ని నిర్ణయించేందుకు గణాంక పద్ధతిని తెలియపర్చేదని పేర్కొంది.
• 2016 అక్టోబర్‌లో సుప్రీం కోర్టు ఉత్తర్వుల మేరకు కట్‌ ఆఫ్‌ తేదీని తొలగిస్తూ ఒక సర్క్యులర్‌ను ఈపీఎఫ్‌వో జారీచేయడంతో పాటు 2004 డిసెంబర్‌ 1, 2017 మార్చి 23 మధ్యలో ఉమ్మడి ఆప్షన్‌ను కోరుతూ వచ్చిన దరఖాస్తులన్నింటినీ తిరస్కరించింది.

2004 డిసెంబర్‌ 1ని గుర్తించాలి

అధిక పెన్షన్‌ను కోరుతూ 90,000కుపైగా దరఖాస్తులు వచ్చాయంటూ ఈపీఎఫ్‌వో చెపుతున్నది. 2004 డిసెంబర్‌ 1-2017 మార్చి 23 మధ్యలో పదవీ విరమణ చేసినవారు సర్వీసులో ఉండగా, అప్పుడు అధిక పెన్షన్‌కు ఉమ్మడి ఆప్షన్‌ దరఖాస్తులు అనుమతించనందున, వారిలో చాలా మంది ఇప్పుడు దరఖాస్తు పెట్టుకున్నారు. వాస్తవ జీతంపై ఈపీఎఫ్‌వోకు చెల్లింపులు చేసిన అర్హులైన వారందరికీ అధిక పెన్షన్‌ వర్తింపచేసేందుకు 2004 డిసెంబర్‌ 1 తేదీని సంస్థ పరిగణనలోకి తీసుకోవాల్సి ఉందని నిపుణులు సూచిస్తున్నారు. ఇదిలా ఉండగా, 2014 సెప్టెంబర్‌ 1 తర్వాత రిటైర్‌ అయిన ఈపీఎస్‌ సభ్యులు ఉమ్మడి ఆప్షన్‌ ఫారంను సమర్పించేందుకు ప్రస్తుతం యూనీఫైడ్‌ పోర్టల్‌లో అవకాశం ఉంది. వీరు అధిక పెన్షన్‌కు దరఖాస్తు చేయడానికి ఈపీఎఫ్‌వో మే 3 వరకూ గడువును పొడిగించింది.