రెడ్డీస్‌ లాభం 1,307 కోట్లు

రాష్ర్టానికి చెందిన ప్రముఖ ఫార్మా సంస్థ డాక్టర్‌ రెడ్డీస్‌ అంచనాలకుమించి రాణించింది. అమెరికాలో కంపెనీ ఔషధాలకు పెరిగిన డిమాండ్‌తో గడిచిన ఆర్థిక సంవత్సరం చివరి త్రైమాసికానికిగాను సంస్థ రూ.1,307 కోట్ల కన్సాలిడేటెడ్‌ నికర లాభాన్ని ఆర్జించింది.

• క్యూ4లో 36 శాతం పెరిగిన ప్రాఫిట్‌

హైదరాబాద్‌, మే 7: రాష్ర్టానికి చెందిన ప్రముఖ ఫార్మా సంస్థ డాక్టర్‌ రెడ్డీస్‌ అంచనాలకుమించి రాణించింది. అమెరికాలో కంపెనీ ఔషధాలకు పెరిగిన డిమాండ్‌తో గడిచిన ఆర్థిక సంవత్సరం చివరి త్రైమాసికానికిగాను సంస్థ రూ.1,307 కోట్ల కన్సాలిడేటెడ్‌ నికర లాభాన్ని ఆర్జించింది. అంతక్రితం ఏడాది ఇదే త్రైమాసికంలో నమోదైన రూ.959 కోట్ల లాభంతో పోలిస్తే ఇది 36 శాతం అధికం. 2022-23 ఏడాది నాలుగో త్రైమాసికంలో రూ.6,297 కోట్లుగా ఉన్న కంపెనీ ఆదాయం గత త్రైమాసికానికిగాను 12 శాతం వృద్ధితో రూ.7,083 కోట్లకు ఎగబాకింది.

• 2023-24 ఆర్థిక సంవత్సరానికిగాను రూ.27,916కోట్ల ఆదాయంపై రూ.5,568 కోట్ల నికర లాభాన్ని గడించింది.
• ఉత్తర అమెరికా నుంచి రూ.12,990 కోట్ల ఆదాయం సమకూరింది. అమ్మకాలు పుంజుకోవడం, మేనీ పోర్ట్‌ఫోలియో, ఫారెక్స్‌ అధికం కావడం ఇందుకు దన్నుగా నిలిచాయి.
• గడిచిన ఆర్థిక సంవత్సరంలో భారత్‌ నుంచి 4640 కోట్ల ఆదాయం లభించింది.
• రూ.5 ముఖ విలువ కలిగిన ప్రతిషేరుకు రూ.40 తుది డివిడెండ్‌(800 శాతం)ను కంపెనీ ప్రతిపాదించింది.
• అమెరికాలో అంచనాలకుమించి రాణించడం వల్లనే గత ఏడాది ఆశాజనక పనితీరు కనబరిచాం.
• -జీవీ ప్రసాద్‌, డాక్టర్‌ రెడ్డీస్‌ కో-చైర్మన్‌, ఎండీ