Marigold Face Mask | పచ్చగా బొద్దుగా ఉండే ఆడపిల్లల్ని ముద్దబంతి పువ్వుతో పోలుస్తారు. నిజమే బంతి పువ్వును చూస్తే తెలుగమ్మాయే గుర్తొస్తుంది. ఆ ముద్దొచ్చే పువ్వు మగువల సౌందర్యానికి మెరుగులద్దేందుకూ పనికొస్తుంది. ఫేస్ప్యాక్ కూడా చేసుకోవచ్చు.
ముద్దబంతి పువ్వులో యాంటీ బ్యాక్టీరియల్, యాంటీ ఇన్ఫ్లమేటరీ గుణాలు అధికం. ఇది సహజసిద్ధ మాయిశ్చరైజర్గా పనిచేస్తూ, మేనిఛాయను మెరుగు పరుస్తుంది. చర్మానికి పోషణనిచ్చే ఔషధగుణాలు ఇందులో ఉన్నాయి. అందుకే మొటిమలు, దద్దులు, ఎగ్జిమాలాంటి చర్మ సంబంధ ఇన్ఫెక్షన్లు, ఇతర వ్యాధుల చికిత్సలో తరచూ ఉపయోగిస్తారు. ఇందులో అధికంగా ఉండే యాంటీ సెప్టిక్ గుణాలు చర్మ సమస్యలను దూరం చేసేందుకు సాయపడతాయి. ఆయుర్వేద గ్రంథాల్లోనూ ముద్దబంతి చికిత్స ప్రస్తావన ఉంది.
ముద్దబంతి పువ్వును మిక్సీలో వేసి పేస్ట్లా చేసుకోవాలి. దానికి పెరుగు, తేనె, చందనం పొడి, నిమ్మరసం కలపాలి. చల్లటి నీళ్లతో ముఖాన్ని శుభ్రపరచుకున్న తర్వాత ఈ మిశ్రమాన్ని రాయాలి. 15 నుంచి 20 నిమిషాలు ఆగి, గోరువెచ్చని నీటితో కడిగేయాలి. ఇంట్లో సులభంగా చేసుకోగలిగే ఈ ఫేస్ప్యాక్ను వారానికి రెండుసార్లు వేసుకోవడం వల్ల మెరుగైన ఫలితాలు ఉంటాయి.
“మొటిమలు తగ్గి చర్మం మెరవాలా? అయితే వీటి గురించి తెలుసుకోండి”