Tragedy | గ్యాస్‌ సిలిండర్‌ లీక్‌ దుర్ఘటనలో చికిత్స పొందుతూ ముగ్గురు మృతి.. నాలుగుకు చేరిన మృతుల సంఖ్య

Tragedy | ఏపీలోని విశాఖ జిల్లా కేంద్రంలో గ్యాస్‌ సిలిండర్‌ లీకై (Gas cylinder) ఒకే కుటుంబానికి నలుగురు తీవ్రంగా గాయపడిన ఘటనలో చికిత్స పొందుతూ మరో ముగ్గురు బుధవారం మరణించారు.

అమరావతి : ఏపీలోని విశాఖ జిల్లా కేంద్రంలో గ్యాస్‌ సిలిండర్‌ లీకై (Gas cylinder) నలుగురు తీవ్రంగా గాయపడిన ఘటనలో చికిత్స పొందుతూ ఒకే కుటుంబానికి చెందిన ముగ్గురు బుధవారం మరణించారు. జిల్లా కేంద్రంలోని మధురవాడ వాంబే కాలనీలో నివాసముంటున్న బాలరాజు అనే వ్యక్తి అయ్యప్పమాల ధరించాడు. గత శుక్రవారం వంట గ్యాస్‌ అయిపోవడంతో కొత్త సిలిండర్‌కు రెగ్యులేటర్‌ను అమర్చాడు.

రెగ్యులేటర్‌ను సక్రమంగా అమర్చకపోవడం వల్ల గ్యాస్‌ లీకేజీ(Gas leakage) అయిన విషయం అతడు గమనించ లేదు. కొద్ది సేపు అనంతరం దేవుడి చిత్రపటాల వద్ద దీపారాధన చేయడానికి అగ్గి వెలిగించడంతో ఒక్కసారిగా ఇంట్లో మంటలు వ్యాపించాయి. దీంతో బాలరాజుతో పాటు భార్య చిన్ని, కుమారులు గిరి, కార్తిక్‌కు తీవ్రగాయాలయ్యాయి. గమనించిన స్థానికులు బాధితులను 108 అంబ్‌లెన్స్‌లో కింగ్‌ జార్జ్‌ ఆసుపత్రికి తరలించారు.

చికిత్స పొందుతూ చిన్న కుమారుడు కార్తిక్‌ రెండు రోజుల క్రితం చనిపోగా బాలరాజు(60), అతడి భార్య చిన్ని (55), పెద్ద కుమారుడు గిరి(22) బుధవారం చికిత్సపొందుతూ మృతి చెందారు. ఒకే కుటుంబానికి చెందిన నలుగురు మరణించడం పట్ల కాలనీలో విషాదఛాయలు (Tragedy) అలుముకున్నాయి.