ఒక పంటకు మరో పంట తోడు. అంతర పంట విధానం.. రైతులకు అదనపు ఆదాయ మార్గం. కూరగాయలు పండించే రైతులు మిర్చిలో అంతర పంటగా కాలిఫ్లవర్ సాగు చేపడితే మంచి దిగుబడి సాధించవచ్చని నిపుణులు చెబుతున్నారు. ఒక వరుసలో మిర్చి, మరో వరుసలో కాలిఫ్లవర్ సాగు చేపట్టాలి. మిర్చి పంట దీర్ఘకాలికమైనది. ఏడాదిపాటు సాగు చేయాలి. కాబట్టి అంతర పంటగా శీతకాలంలో తక్కువ సమయంలో, ఎక్కువ దిగుబడిని ఇచ్చే కాలిఫ్లవర్ను సాగు చేయడం లాభదాయకం. ఈ విధానంలో మొక్కలకు తప్ప పెద్దగా పెట్టుబడి పెట్టాల్సిన పనిలేదు. మిర్చి దిగుబడి ప్రారంభమయ్యేలోపు కాలిఫ్లవర్ చేతికొస్తుంది. ఆ తర్వాత తీగజాతి పంటలు సాగు చేసుకోవచ్చు. ఇలా ఏడాది పొడవునా, పంటలను మారుస్తూ మంచి దిగుబడి, అధిక రాబడి సాధించవచ్చు. వాతావరణ పరిస్థితులు అనుకూలించక ఒక పంటలో నష్టం వాటిల్లినా, మరో పంట రైతులను ఆదుకుంటుంది.
ఎకరాకు 7,500 మొక్కలు అవసరం. పెట్టుబడి రూ.40 వేల నుంచి రూ.60 వేలు అవుతుంది. ఎకరాకు నాలుగు నుంచి ఆరు టన్నుల దిగుబడి వస్తుంది. టన్ను రూ.20 వేల నుంచి రూ.30 వేల వరకు ఉంటుంది. పంట నాటిన 45-60 రోజుల్లో దిగుబడి మొదలవుతుంది.