Visit:
మంచిర్యాల : విద్యుత్ కృత్రిమ కొరత పేరిట తెలంగాణ రైతాంగానికి రేవంత్ రెడ్డి సర్కార్ తీరని ద్రోహం చేస్తున్నారని బీఆర్ఎస్ నాయకులు ( BRS Leaders ) ఆగ్రహం వ్యక్తం చేశారు. బీఆర్ఎస్ వర్కింగ్ ప్రెసిడెంట్ కేటీఆర్ ఆదేశాల మేరకు ఉమ్మడి ఆదిలాబాద్ బీఆర్ఎస్ ప్రజాప్రతినిధులు ,ఎమ్మెల్యేలు కోవా లక్ష్మి , అనిల్ యాదవ్ , మాజీ మంత్రి జోగు రామన్న మాజీ ఎమ్మెల్యేలు బాల్క సుమన్ , దుర్గం చిన్నయ్య, కోనేరు కోనప్ప ,నాయకులు జాన్సన్ నాయక్ , రామకృష్ణారెడ్డి తదితరులు ఎస్టీపీపీని సందర్శించారు.
ఈ సందర్భంగా వారు మాట్లాడుతూ జైపూర్ సింగరేణి థర్మల్ పవర్ ప్లాంట్ (STPP) లో అన్ని సదుపాయాలూ ఉన్నప్పటికీ కావాలనే కాంగ్రెస్ ప్రభుత్వం తక్కువ విద్యుదుత్పత్తి చేస్తోందని మండిపడ్డారు. 24 గంటల కరెంటు ఇస్తే రైతులకు బోనస్ ఇవ్వాల్సి వస్తుందని, పండించిన పంటలను కొనుగోలు చేయాల్సి వస్తుందని విద్యుత్ ఇవ్వడం లేదని ఆరోపించారు. ఇది ప్రకృతి తెచ్చిన కొరత కాదని, కాంగ్రెస్ తెచ్చిన కృత్రిమ విద్యుత్ కొరత అని విమర్శించారు.
ప్రభుత్వ ఆదేశాలతోనే చాలా తక్కువ విద్యుత్ ఉత్పత్తి చేస్తున్నామని ఇంజినీర్లు తెలిపారని పేర్కొన్నారు. రేవంత్ రెడ్డి సర్కార్ ఆనాటి పాత చీకటి రోజులు తీసుకొస్తున్నారని ఆరోపించారు. రాష్ట్రంలో కరెంటు కోతలతో రైతులు, బీడీ కార్మికులు, ప్రజలంతా తీవ్ర అవస్థలు పడుతున్నారని ఆందోళన వ్యక్తం చేశారు. తన గురువు చంద్రబాబు ఆదేశాలు పాటిస్తూ తెలంగాణను రేవంత్ నాశనం చేస్తున్నారని పేర్కొన్నారు. రేవంత్ రెడ్డికి అవినీతి, అరాచకాలు, దోపిడీ, కమీషన్ల మీద ఉన్న శ్రద్ధ రైతులు, ప్రజలపై లేదని ఆరోపించారు.
