యమపాశాలు

విద్యుత్‌ అధికారుల నిర్లక్ష్యం.. రైతులు, ప్రజల అజాగ్రత్త.. అవగాహన లోపంతో ప్రజలు, మూగజీవాలు విద్యుత్‌ ప్రమాదాల బారిన పడి ప్రాణాలు కోల్పోతున్నారు. గ్రామాలు, పట్టణాలు అనే తేడా లేకుండా విద్యుత్‌ వైర్లు సరిచేస్తూ, పొలల్లో మోటర్ల వద్ద కరెంటు షాక్‌కు గురై అనేక మంది ప్రాణాలు కోల్పోతున్నారు. విద్యుత్‌ భద్రతా వారోత్సవాల్లో భాగంగా అధికారులు నామమాత్రంగా అవగాహన కార్యక్రమాలు నిర్వహిస్తున్నారనే ఆరోపణలు ఉన్నాయి.

• ప్రమాదకరంగా విద్యుత్‌ వైర్లు, ట్రాన్స్‌ఫార్మర్లు
• కరెంటు షాక్‌తో ప్రాణాలు కోల్పోతున్న ప్రజలు, పశువులు
• రక్షణ కవచాలు లేకపోవడంతో ప్రమాదాలు

ఖానాపూర్‌, జూలై 19 : విద్యుత్‌ అధికారుల నిర్లక్ష్యం.. రైతులు, ప్రజల అజాగ్రత్త.. అవగాహన లోపంతో ప్రజలు, మూగజీవాలు విద్యుత్‌ ప్రమాదాల బారిన పడి ప్రాణాలు కోల్పోతున్నారు. గ్రామాలు, పట్టణాలు అనే తేడా లేకుండా విద్యుత్‌ వైర్లు సరిచేస్తూ, పొలల్లో మోటర్ల వద్ద కరెంటు షాక్‌కు గురై అనేక మంది ప్రాణాలు కోల్పోతున్నారు. విద్యుత్‌ భద్రతా వారోత్సవాల్లో భాగంగా అధికారులు నామమాత్రంగా అవగాహన కార్యక్రమాలు నిర్వహిస్తున్నారనే ఆరోపణలు ఉన్నాయి. ప్రమాదాలపై రైతులు, ప్రజలకు అవగాహన కల్పించాల్సి ఉన్నప్పటికీ తూతూ మంత్రంగానే చేపడుతున్నట్లు ప్రజలు ఆరోపిస్తున్నారు. ఇందుకు ఇటీవల జరుగుతున్న సంఘటనలే నిదర్శనంగా నిలుస్తున్నాయి. పొలాల్లో పశువులకు విద్యుత్‌ తీగలు,ట్రాన్స్‌ఫార్మర్‌లు యమపాశాలుగా మారుతున్నాయి.

 

యమపాశాలుగా ట్రాన్స్‌ఫార్మర్‌లు, విద్యుత్‌ తీగలు..
ఇళ్లు, పొలాల్లో విద్యుత్‌ ప్రమాదాల రూపంలో మృత్యువు పొంచి ఉంది. విద్యుత్‌ వైర్లు సరిచేస్తూ, వ్యవసాయ క్షేత్రాల్లో, పశువులు మేతకు వెళ్లి విద్యుత్‌ ప్రమాదాల బారిన పడడం ఇలా ఏదో ఒక చోట విద్యుత్‌ ప్రమాదాలు సంభవిస్తూనే ఉన్నాయి. సామాన్య ప్రజలకే కాకుండా విద్యుత్‌ సిబ్బంది ప్ర మాదాల బారిన పడిన ఘటనలున్నాయి. ఇటీవల కాలంలో ఖానాపూర్‌ నియోజకవర్గంలోని ఖానాపూర్‌, పెంబి, దస్తురాబాద్‌, కడెం మండలాల్లో విద్యుత్‌ ప్రమాదాల్లో మూగజీవాలతోపాటు మనుషులు మృత్యువాత పడ్డారు. ఇళ్లపై విద్యుత్‌ తీగలు, పొలాల్లో ట్రాన్స్‌ఫార్మర్ల వద్ద రక్షణ కంచెలు లేకపోవడం, లూజ్‌లైన్‌లు ప్రమాదాలకు కేంద్ర బిందువుగా మా రుతున్నాయి. విద్యుత్‌ భద్రతా వా రోత్సవాలు పకడ్బందీగా చేపట్టి ప్రజలకు అవగాహన కల్పించాల్సిన అవశ్యకత ఉంది.

విద్యుత్‌ సిబ్బంది సహకారం తీసుకోవాలి
వర్షాకాలంలో జరిగే విద్యుత్‌ ప్రమాదాలపై ప్రజలకు అవ గాహన కల్పిస్తున్నాం. విద్యుత్‌ సిబ్బందికి తగిన సూచనలు చేసి ప్రమాదాల నివారణకు చర్యలు తీసుకుంటున్నాం. విద్యుత్‌ పరికరాలు, మోటర్లు రిపేర్‌ చేసేటప్పుడు సొంత నిర్ణయాలు తీసుకోకుండా సిబ్బంది, అనుభవం ఉన్న వ్యక్తుల ద్వారా వాటిని సరి చేసుకోవాలి. విద్యుత్‌ సమస్యలు ఏమై నా ఉంటే హెల్ప్‌లైన్‌ నంబర్‌ 1912కు ఫోన్‌ చేయాలి. పశు వులను మెతకు తీసుకెళ్లే వ్యక్తులు పశువులను ట్రాన్స్‌ఫార్మ ర్‌లకు దూరంగా ఉంచాలి. విద్యుత్‌ సరాఫరాలో హెచ్చు తగ్గులుంటే వెంటనే పరికరాలను అఫ్‌చేసి విద్యుత్‌ సిబ్బందికి సమాచారం ఇవ్వాలి. – రాంసింగ్‌, విద్యుత్‌ శాఖ ఏఈ, ఖానాపూర్‌.

ఖానాపూర్‌ నియోజకవర్గంలో జరిగిన ఘటనలు..
ప్రజలు..

• 2025 నవంబర్‌ 30 : ఖానాపూర్‌ మండలంలోని సుర్జాపూర్‌ గ్రామానికి చెందిన పన్నెల వెంకట్రాములు పంటకు నీరు పెట్టడానికి వెళ్లి విద్యుత్‌ షాక్‌తో మృతి చెందాడు.
• 2026 ఏప్రిల్‌ 16 : కడెం మండలంలోని పాత మద్దిపడగ గ్రామానికి చెందిన కారం సుశీల కూలర్‌లో నీళ్లు పోస్తుండగా విద్యుత్‌షాక్‌తో మృతి చెందింది.
• 2026 జూన్‌ 16 : పెంబి మండలంలోని కొరకంటి తండాలో కూలర్‌లో నీళ్లు పోస్తుండగా విద్యుత్‌ షాక్‌కు గురై తండ్రీకొడుకులు మృతి చెందారు.
• 2026 జూలై 13 : కడెం మండలంలోని పెద్దురుకు చెందిన జీల నాగరాజు వ్యవసాయ బావి వద్ద మోటరుకు మరమ్మతులు చేస్తుండగా విద్యుత్‌ షాక్‌కు గురై నీటిలో పడి మరణించాడు.
• గతంలో ఖానాపూర్‌ పట్టణానికి చెందిన విద్యుత్‌ ఉద్యోగి విద్యుత్‌ సరాఫరాలో అంతరాయం ఏర్పడడంతో విద్యుత్‌ స్తంభంపై ఉన్న వైర్లను సరి చేస్తుండగా విద్యుత్‌షాక్‌తో కిందపడి తన చేతిని కోల్పోయాడు.

పశువులు..

• 2026 జనవరి 16 : ఖానాపూర్‌ మండలంలోని సూర్జాపూర్‌ గ్రామ శివారులో బర్రె ట్రాన్స్‌ఫార్మర్‌కు తగిలి మృత్యువాత పడింది.
• 2026 మే 27 : ఖానాపూర్‌ మండలంలోని దిల్‌వార్‌పూర్‌లో వేలాడుతున్న విద్యుత్‌ తీగలను తగిలి ఐదు బర్రెలు మృత్యువాత పడ్డాయి.
• 2026 జూన్‌ 11 : బాదన్‌కుర్తి గ్రామంలో ట్రాన్‌ఫార్మర్‌కు తగిలి ఆవు మృతి చెందింది.
• 2026 జూలై 7 : దస్తురాబాద్‌ మండలంలోని బుట్టాపూర్‌ గ్రామంలో విద్యుదాఘాతానికి గురై చేనులోనే ఎద్దు మృత్యువాత పడింది.
• ఇటీవల పెంబి మండలంలోని పోచంపల్లికి చెందిన రాథోడ్‌ సవాయిరాంకు చెందిన ఆవు విద్యుదాఘాతానికి గురై మృత్యువాత పడింది.