Bathukamma Celebrations | కుభీర్‌లో ఘనంగా కొనసాగుతున్న బతుకమ్మ సంబరాలు

Bathukamma Celebrations | నిర్మల్ జిల్లా కుభీర్ మండల కేంద్రంలోని బజార్ గల్లీలో ఆర్యవైశ్య సంఘం మహిళలు గురువారం బతుకమ్మ సంబరాలను ఘనంగా నిర్వహించారు.

కుభీర్ : నిర్మల్ జిల్లా కుభీర్ ( Kubheer ) మండల కేంద్రంలోని బజార్ గల్లీలో ఆర్యవైశ్య సంఘం మహిళలు గురువారం బతుకమ్మ సంబరాలను ( Bathukamma Celebrations ) ఘనంగా నిర్వహించారు. తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగను పురస్కరించుకొని మహిళలు పెద్ద సంఖ్యలో పాల్గొని ఉత్సాహంగా వేడుకలు జరుపుకున్నారు.

ఈ సందర్భంగా ప్రతి ఇంటి నుంచి మహిళలు వివిధ రకాల రంగురంగుల పూలతో అందంగా బతుకమ్మలను పేర్చి సంప్రదాయ బతుకమ్మ పాటలు పాడుతూ, లయబద్ధంగా నృత్యాలు చేస్తూ, కోలాటాలు వేస్తూ సందడి చేశారు. డీజే సంగీతం, చప్పట్ల మధ్య ఉత్సాహం గా సాగిన ఈ వేడుకలు బజార్ గల్లీలో పండుగ వాతావరణాన్ని నింపాయి. రాత్రివేళ విద్యుత్ దీపాల వెలుగుల్లో వివిధ రంగుల పూలతో పేర్చిన బతుకమ్మలు ప్రత్యేక ఆకర్షణగా నిలిచాయి. మండల కేంద్రంలోని వివిధ ప్రాంతాల నుంచి మహిళలు, స్థానికులు బతుకమ్మ సంబరాలను తిలకించేందుకు తరలివచ్చారు.

పూల పండుగగా పేరుగాంచిన బతుకమ్మ వేడుకలు మహిళల్లో ఐక్యతను, పరస్పర స్నేహ భావాన్ని పెంపొందించడంతో పాటు తెలంగాణ సంస్కృతి, సంప్రదాయాల పరిరక్షణకు దోహదపడుతున్నాయని వేడుకల్లో పాల్గొన్న రెడ్డిశెట్టి సునీత, ప్రణీత అభిప్రాయపడ్డారు. ఈ వేడుకల్లో ఆర్యవైశ్య సంఘం అధ్యక్షులు రెడ్డిశెట్టి నిఖిల్, రెడ్డిశెట్టి సంతోష్, ఆనంద్, ఆర్.నారాయణ్, బాలాజీ , మహిళలు పాల్గొన్నారు.