యోగ క్షేమాలు

ఆధునిక జీవనశైలి ఆరోగ్యంపై ప్రభావం చూపుతున్నది. తీవ్ర ఒత్తిడి, చర్మం పొడిబారిపోవడం, ముడతలు, జుట్టు రాలడం తదితర సమస్యలు యువతరాన్ని ఇబ్బంది పెడుతున్నాయి. యోగాతో వీటన్నిటినీ నియంత్రించవచ్చు

ఆధునిక జీవనశైలి ఆరోగ్యంపై ప్రభావం చూపుతున్నది. తీవ్ర ఒత్తిడి, చర్మం పొడిబారిపోవడం, ముడతలు, జుట్టు రాలడం తదితర సమస్యలు యువతరాన్ని ఇబ్బంది పెడుతున్నాయి. యోగాతో వీటన్నిటినీ నియంత్రించవచ్చు.

హార్మోన్ల ప్రభావం: యోగా ఎండోక్రైన్‌ వ్యవస్థను ప్రభావితం చేస్తుంది. ఈ వ్యవస్థ సమర్థంగా ఉంటే హార్మోన్ల పనితీరు మెరుగ్గా ఉంటుంది. చర్మ సౌందర్యం, కేశ సంరక్షణ విషయంలో ఇబ్బందులు ఉండవు.

ఫేస్‌ యోగా: ఎవరికివారు తమ దినచర్యలో ఫేస్‌ యోగాను భాగం చేసుకోవాలి. ఉదాహరణకు కళ్ల కింద సున్నితంగా మసాజ్‌ చేయడం వల్ల కంటి ఉబ్బరం, నల్లటి వలయాలు తొలగిపోతాయి.

కపాల ధౌతి: యోగా వల్ల అలసట తగ్గిపోతుంది. ఏకాగ్రత పెరుగుతుంది. కపాల రంధ్ర ధౌతి పద్ధతిలో నుదుటిపై మర్దన చేస్తూ ప్రశాంతత పొందవచ్చు. బెలూన్‌ టెక్నిక్‌ కూడా మంచిదే. ఇందులో బుగ్గలలో గాలి నింపుకొని కొన్ని క్షణాలు అలాగే ఉంచాలి. తర్వాత క్రమంగా వదలాలి. దీనివల్ల రక్త
ప్రసరణ సక్రమంగా జరుగుతుంది.

ఆసనాలు: జుట్టు, చర్మ సంరక్షణకు సర్వాంగాసనం, మత్స్యాసనం, హలాసనం బాగా ఉపయోగపడతాయి. ప్రారంభంలో కష్టంగా అనిపించినా.. సాధన చేసినకొద్దీ శరీరం రబ్బరు బంతిలా సులువుగా వంగుతుంది.

ప్రకృతితో స్నేహం: క్రమం తప్పకుండా వాకింగ్‌, జాగింగ్‌ లాంటివి చేస్తే మంచిది. వారంలో ఒకరోజు పచ్చదనం మధ్య గడిపితే మనసుకు ఆహ్లాదంగా ఉంటుంది. ఇక చెట్టుకింద సేద
తీరితే ఆక్సిజన్‌ థెరపీ తీసుకున్నట్టే. నిత్యం ఓ నలభై నిమిషాలు మనకోసం మనం కేటాయించుకోవడం వల్ల ఎన్నో ఆరోగ్య ప్రయోజనాలను పొందవచ్చు.