Shreya katuri | అగ్గిపెట్టెల సేక‌ర‌ణే ఆమె లోకం.. వాటితో ఏం చేస్తుందో తెలిస్తే షాక‌వ్వల్సిందే

January 12, 2022 / 05:45 AM IST

shreya katuri | అగ్గిపెట్టెను చాలామంది వంటింటి వస్తువుగానో.. చుట్ట, బీడీ, సిగరెట్‌ అభిమానుల జేబు సరుకుగానో చూస్తారు. కానీ, మీరెప్పుడైనా అగ్గిపెట్టెను నిశితంగా గమనించారా? వాటిపై ఉండే కళాఖండాలను ఆస్వాదించారా? అసలు మనదేశంలో ఎన్ని రకాల అగ్గిపెట్టెలు ఉన్నాయో తెలుసా? ఆ సమాచారమంతా కాటూరి శ్రేయకు తెలుసు. ఎందుకంటే ఆమెకు అగ్గిపెట్టెలే లోకం.

న్యూఢిల్లీ నివాసి శ్రేయ కాటూరి (28).. పదేండ్ల క్రితమే అగ్గిపెట్టెలపై మనసు పారేసుకుంది. వాటిపై ఉండే రకరకాల డిజైన్లు ఆమెను ఆకట్టుకున్నాయి. అవన్నీ డిజైన్లు మాత్రమే కాదు.. మన చరిత్ర, సంస్కృతిని నలుదిశలా వ్యాపింపజేసే మాధ్యమాలు. ‘ప్రతి అగ్గిపెట్టెకు ఓ కథ ఉంటుంది. ఆ చిహ్నాలు, డిజైన్లు నాలో ఆసక్తిని రేకెత్తించాయి’ అంటున్నది శ్రేయ. అగ్గిపెట్టెలను సేకరించేందుకే ఇటీవల ఢిల్లీ నుంచి కెనడాకు ప్రయాణం అయ్యిందామె. ఈ యువతి ఇప్పటివరకూ దాదాపు 5 వేలకు పైగా దేశ విదేశాల అగ్గిపెట్టెలను సేకరించింది. తన ఇన్‌స్టా పేజీ ‘ఆర్ట్‌ ఆన్‌ ఏ బాక్స్‌’లో ఆ ఫొటోలు పోస్టు చేస్తూ ఉంటుంది. శ్రేయ దగ్గర స్వాతంత్య్రానికి పూర్వం నాటి అగ్గిపెట్టెలూ ఉన్నాయి. కాలాను గుణంగా అగ్గిపెట్టెలపై డిజైన్లు ఎలా మారాయి? ఎలా అభివృద్ధి చెందాయి? అనే దానిపై ప్రస్తుతం అధ్యయనం చేస్తున్నదామె.