రోజ్‌మేరీ.. జుట్టుకు ప్యారీ!

నల్లని, ఒత్తయిన జుట్టు కావాలని అందరికీ ఉంటుంది. కానీ తినే ఆహారం నుంచి పీల్చేగాలి వరకు ప్రతీది కలుషితం కావడంతో జుట్టు ఆరోగ్యం దెబ్బతింటున్నది. పాతికేండ్లకే తెల్లజుట్టు పలకరిస్తున్నది.

నల్లని, ఒత్తయిన జుట్టు కావాలని అందరికీ ఉంటుంది. కానీ తినే ఆహారం నుంచి పీల్చేగాలి వరకు ప్రతీది కలుషితం కావడంతో జుట్టు ఆరోగ్యం దెబ్బతింటున్నది. పాతికేండ్లకే తెల్లజుట్టు పలకరిస్తున్నది. కేశ సంపదను కాపాడుకోవడానికి రకరకాల నూనెలు, మాస్క్‌లు వాడుతున్నారు. అయితే రసాయనాలు కలిసిన సీరమ్‌లు, హెయిర్‌ డైల కంటే సహజమైన నూనెలు జుట్టు కుదుళ్లను బలంగా మారుస్తాయి. సహజ సువాసనలు వెదజల్లే రోజ్‌మేరీ ఆయిల్‌ జుట్టు సంరక్షణకు ఎంతగానో ఉపయోగపడుతుంది.

• రోజ్‌మేరీ ఆయిల్‌ జుట్టుకు పోషణ అందిస్తుంది. ఈ నూనెను ఇంట్లోనే తయారు చేసుకోవచ్చు. వేడి చేసిన ఆలివ్‌ నూనెలో రోజ్‌మేరీ ఆకులను కాసేపు మరిగించాలి. నూనె చల్లారిన తర్వాత ఒక సీసాలోకి వడగట్టుకోవాలి. ఈ నూనెను వారానికి రెండుసార్లు జుట్టు కుదుళ్లకు పట్టిస్తే మంచి ఫలితం ఉంటుంది.
• రోజ్‌మేరీ ఆయిల్‌ జుట్టు చిట్లిపోవడాన్ని అరికడుతుంది. ఇందులోని యాంటీ మైక్రోబియల్‌ లక్షణాలు చుండ్రు, దురద వంటి సమస్యలను నివారిస్తాయి. నూనెలోని యాంటీ ఫంగల్‌ లక్షణాలు చుండ్రును తగ్గించి జుట్టు కుదుళ్లకు బలాన్నిస్తాయి.
• ఈ నూనెతో మసాజ్‌ చేయడం వల్ల రక్త ప్రసరణ మెరుగుపడుతుంది. జుట్టు ఆరోగ్యంగా, దృఢంగా మారుతుంది. జుట్టుకు సహజమైన మెరుపు వస్తుంది.
• రోజ్‌మేరీ ఆయిల్‌ మాత్రమే కాదు నీటిని కూడా జుట్టు సంరక్షణకు ఉపయోగించవచ్చు. ఓ గిన్నెలో నీళ్లు తీసుకుని దానిలో రోజ్‌మేరీ ఆకులు వేసి మరిగించి చల్లార్చాలి. ఈ నీటిని వడకట్టి స్ప్రే బాటిల్‌లో పోసుకోవాలి. రాత్రి పడుకునేముందు జుట్టుపై స్ప్రే చేసుకుంటే.. మంచి గుణం కనిపిస్తుంది.