నీతా లుల్లా.. ఫ్యాషన్ ప్రపంచంలో పరిచయం అవసరం లేని పేరు. సృజనకు పెట్టింది పేరు. మూడు దశాబ్దాల సుదీర్ఘ అనుభవం తర్వాత కూడా ఓ యువ డిజైనర్లా కొత్తదనం కోసం తపిస్తారామె. కాబట్టే, ‘జోధా అక్బర్’ నుంచి ‘చంద్రముఖి-2’ వరకు అనేక సినిమా అవకాశాలు కోరి వచ్చాయి. జయలలిత బయోపిక్కూ పనిచేశారు. సమంత కథానాయికగా విడుదలకు సిద్ధం అవుతున్న ‘శాకుంతలం’ చిత్రానికి కూడా తనే కాస్ట్యూమ్ డిజైనర్. నీతా లుల్లా ప్రతి మాటా ఆమె మనసుకు అద్దం పట్టేదే.
ప్రతి ప్రయత్నం కొత్తగా ఉండాలి. గతంలో కంటే మెరుగైన ఫలితాలు సాధించాలి. అప్పుడే పరిశ్రమలో మనకంటూ ఓ ముద్ర ఏర్పడుతుంది. ఇప్పటివరకూ నాలుగువందల చిత్రాలకు కాస్ట్యూమ్స్ అందించడం వెనుక.. సృజన మాత్రమే కాదు, అంతకు మించిన తపన ఉంది.
ప్రతిరోజూ ఓ కొత్త విషయం నేర్చుకోవాలి. కానీ అదంత సులభం కాదు. అందులోనూ కెరీర్లో ఓ దశకు చేరుకున్న తర్వాత మన బుర్రను అహం కమ్మేస్తుంది. దీంతో ఆలోచనల ద్వారాలు మూసుకుపోతాయి.
‘శాకుంతలం’ ఓ పీరియాడికల్ సినిమా. కథానాయిక కోసం రసాయనాల జాడలేని సేంద్రియ వస్ర్తాలనే ఎంచుకున్నాం. జర్దోసి, హ్యాండ్ ఎంబ్రాయిడరీకి ప్రాధాన్యం ఇచ్చాం. కావ్యనాయిక శకుంతల ఇలానే
ఉండేదేమో.. అన్నంత సహజంగా సమంతను ముస్తాబు చేశాం.
కొత్త తరానికి నా సలహా ఒకటే. మీరు ప్రేమించే వృత్తినే ఎంచుకోండి. అదే ప్రపంచమని అనుకోండి. ఎత్తుపల్లాలు సహజం. నా విషయంలో.. నేను మాత్రమే చేయగలను అనుకున్న పనులు మాత్రమే తీసుకుంటాను. మిగతా బాధ్యతలను అందులో నైపుణ్యం ఉన్నవారికి అప్పగిస్తాను.
ఇదే నా విజయ రహస్యం కూడా.
సినిమాల విషయానికొస్తే.. ‘చంద్రముఖి-2’ పనులు వేగంగా జరుగుతున్నాయి. పవన్ కల్యాణ్ హీరోగా ఓ చిత్రానికి కాస్ట్యూమ్స్ అందిస్తున్నా. ఫ్యాషన్ను సినిమాలు చాలా ప్రభావితం చేస్తున్నాయి. ఫలానా
హీరోయిన్ ధరించిన డ్రెస్ అంటే చాలు.. క్షణాల్లో ట్రెండింగ్ అవుతుంది.