Visit:
వరంగల్, మే 16 : కాకతీయ పట్టణాభివృద్ధి సంస్థ (కుడా)లో వారి జోడీ బంధం చాలా బలంగా నాటుకుపోయింది. గత కొన్నేళ్లుగా ఇక్కడ వారి హవానే కొనసాగుతున్నది. వారు ఎంత చెబితే అంత అన్నట్లుగా ఏదైనా వారి కనుసన్నల్లోనే జరిగేది. అయితే, ఇటీవల వారి జోడీ వీడిపోయింది. ఇద్దరు అధికారుల్లో ఒకరు ఉద్యోగ విరమణ పొందగా, మరొకరు మరి కొన్ని నెలల్లో రిటైర్ కానున్నారు. అయితే ఉద్యోగ విరమణ పొందిన అధికారిని ఎక్స్టెన్షన్ పేరిట మళ్లీ కుడా కార్యాలయానికి తీసుకొచ్చేందుకు తీవ్ర ప్రయత్నాలు జరుగుతున్నాయి. పనిలోపనిగా మరికొన్ని నెలల్లో విరమణ పొందనున్న మరో కీలక అధికారి ముందస్తు ఎక్స్టెన్షన్ కోసం సైతం ప్రయత్నిస్తున్నట్లు సమాచారం. ఎక్స్టెన్షన్ వస్తుందన్న ఆశతో ఉన్న అధికారి నెల రోజుల క్రితం విరమణ పొందినా ఆయనకు కార్యాలయంలో ఎలాంటి సన్మాన కార్యక్రమాలు చేయలేదు. ‘మళ్లీ వస్తాను.. ఇప్పుడే ఎందుకు’ అంటూ వద్దన్నట్లు కార్యాలయంలో చర్చించుకుంటున్నారు.
ముందస్తు ఎక్స్టెన్షన్ కోసం సిఫారసు
కుడా కార్యాలయంలో ఆ ఇద్దరు అధికారుల జోడీ బంధం కలిసి ఉండేలా ఉన్నతాధికారులు సైతం సహకరిస్తున్నారనే విమర్శలు వెల్లువెత్తుతున్నాయి. నెల రోజుల క్రితం రిటైర్ అయిన ఇంజినీరింగ్ అధికారి ఎక్స్టెన్షన్ కోసం సిఫారసు లేఖతోపాటు మరో ఆరు నెలల్లో ఉద్యోగ విరమణ చేసే కుడాలోని కీలక అధికారికి సైతం ఎక్స్టెన్షన్ ఇవ్వాలని కోరడం చర్చనీయాంశంగా మారింది. ఇంకా ఉద్యోగ విరమణ పొందని అధికారికి ముందస్తుగానే ఎక్స్టెన్షన్ ఇవ్వాలని ఉన్నతాధికారి సిఫారసు చేయడమేమిటంటున్న ప్రశ్నలు వెల్లువెత్తుతున్నాయి. కొన్ని దశాబ్దాల కాలంగా సదరు అధికారుల జోడీ కుడా కార్యాలయంలో ఏకఛత్రాధిపత్యం చెలాయిస్తున్నారనే విమర్శలున్నాయి.
ప్రస్తుతం ఉద్యోగ విరమణ పొంది నెల రోజులు కాకుండానే సదరు ఇంజినీర్ ఎక్స్టెన్షన్ కోసం ప్రజాప్రతినిధులు, అధికారుల చుట్టూ కాళ్లరిగేలా తిరగడం విస్మయం కలిగిస్తున్నది. దీంతో పాటు జోడీ కలిసి ఉండేలా ముందస్తు సిఫారసు చేసుకోవడం కుడా కార్యాలయానికే చెల్లుతుంది. అయితే ఈ వ్యవహారంపై జిల్లాకు చెందిన ఒక ప్రజాప్రతినిధి అభ్యంతరం చెప్పినట్లు కుడాలో గుసగుసలు వినిపిస్తున్నాయి. గతంలో కుడా చైర్మన్గా పనిచేసిన సదరు ప్రజాప్రతినిధి ఉద్యోగ విరమణకు ఆరు నెలల సమయమున్నా అధికారికి ఇప్పడే ఎక్స్టెన్షన్ కోసం సిఫారసు చేయడమేంటని ప్రశ్నించినట్లు సమాచారం. దీంతో కుడా ఉన్నతాధికారులు వెనక్కి తగ్గినట్లు తెలుస్తున్నది. ఉద్యోగ విరమణ పొందిన ఇంజినీర్ ఎక్స్టెన్షన్ లేఖను మాత్రమే ప్రభుత్వానికి పంపించినట్లు తెలిసింది.
