Visit:
హనుమకొండ చౌరస్తా, ఆగస్టు 3 : హనుమకొండ జవహర్‌లాల్‌ నెహ్రూ స్టేడియం (జేఎన్‌ఎస్‌)లో ఆదివారం 11వ రాష్ట్రస్థాయి అథ్లెటిక్స్‌ పోటీలు ఉల్లాసంగా, ఉత్సాహంగా ప్రారంభమయ్యాయి. అథ్లెటిక్స్‌ ఫెడరేషన్‌ ఆఫ్‌ ఇండియా, స్పోర్ట్స్‌ అథారిటీ ఆఫ్‌ తెలంగాణ, తెలంగాణ అథ్లెటిక్స్‌ అసోసియేషన్‌ ఆధ్వర్యంలో రెండు రోజుల పాటు ఈ క్రీడలు జరుగనున్నాయి. అండర్‌-14, 16, 18, 20 బాయ్స్‌ అండ్‌ గర్ల్స్‌, మెన్‌ అండ్‌ ఉమెన్‌ విభాగాల్లో పోటీ పడేందుకు 33 జిల్లాల నుంచి 1,400 మంది అథ్లెట్లు హాజరయ్యారు.
ఈ పోటీలను ఎమ్మెల్యేలు నాయిని రాజేందర్‌రెడ్డి, కేఆర్‌ నాగరాజు ముఖ్యఅతిథులుగా పాల్గొని ప్రారంభించారు. ఈ సందర్భంగా నాయిని మాట్లాడుతూ రానున్న రోజుల్లో వరంగల్‌ క్రీడా హబ్‌గా మారుతుందన్నారు. జిల్లాలో క్రికెట్‌ స్టేడియం, స్పోర్ట్స్‌ స్కూల్‌ ఏర్పాటు చేస్తున్నామని, క్రీడా పాఠశాలలో ఈ ఏడాది నుంచే తరగతులు ప్రారంభమవుతాయన్నారు. వరంగల్‌ వేదికగా రాష్ట్రస్థాయి పోటీలు జరగడం అభినందనీయమన్నారు.
ఎమ్మెల్యే కేఆర్‌ నాగరాజు మాట్లాడుతూ క్రీడాభివృద్ధికి ప్రత్యేక కృషి చేస్తున్నట్లు తెలిపారు. కాగా, మొదటి రోజు అథ్లెట్లు బంగారు పతకమే లక్ష్యంగా సింథటిక్‌ ట్రాక్‌పై పరుగులు తీయగా, లాంగ్‌ జంప్‌, జావెలిన్‌త్రోలో ప్రతిభ కనబర్చారు. ఈ సందర్భంగా 5,000 మీటర్ల పరుగుపందెంలో రాష్ట్రస్థాయిలో ప్రథమ, ద్వితీయ, తృతీయ స్థానాల్లో నిలిచిన క్రీడాకారులకు అతిథులు బహుమతులు అందజేశారు.
కార్యక్రమంలో తెలంగాణ అథ్లెటిక్స్‌ అసోసియేషన్‌ రాష్ట్ర కార్యదర్శి సారంగపాణి, జిల్లా యువజన క్రీడల శాఖ అధికారి గుగులోత్‌ అశోక్‌కుమార్‌, ఆర్గనైజింగ్‌ సెక్రటరీ పగిడాల వెంకటేశ్వర్‌రెడ్డి, బిర్లా ఓపెన్‌ మైండ్స్‌ డైరెక్టర్‌ నిషాంత్‌, కోచ్‌లు శ్రీమన్నారాయణ, నాగరాజు, జిల్లా ఉపాధ్యక్షుడు ఐలి చంద్రమోహన్‌, మంచిర్యాల సెక్రటరీ మారయ్య తదితరులు పాల్గొన్నారు.
