ఆకాశంలో వింతగా గ్రీన్‌ లైట్‌… ఏలియన్‌ దాడిగా నెటిజన్ల అనుమానం

కేప్ టౌన్: ఆకాశంలో వింతగా గ్రీన్‌ లైట్‌ కనిపించింది. దీంతో ఏలియన్‌ దాడిగా నెటిజన్లు అనుమానం వ్యక్తం చేశారు. దక్షిణాఫ్రికాలోని పలు ప్రాంతాల్లో బుధవారం ఉదయం 8 గంటలకు ఆకాశంలో ఆకుపచ్చ రంగులో కాంతి కనిపించింది. గ్రీన్‌ రంగులోని గ్రహశకలం మాదిరిగా ఇది ఉన్నట్లు దీనిని చూసిన కొందరు తెలిపారు. స్కాట్స్‌విల్లే, డర్బన్, జోహన్నెస్‌బర్గ్ ప్రాంతాల్లో ఈ వింత కాంతిని చూసినట్లు చాలా మంది ఫేస్‌బుక్‌లో పేర్కొన్నారు. ‘ఇది నిజంగా విచిత్రమైన దృశ్యం. మెరుస్తున్న లైట్లతో ఉన్న వస్తువును చూశాను’ అని మెరీనా అనే మహిళ ఫేస్‌బుక్‌లో పోస్ట్‌ చేసింది. ఈ విషయాన్ని తన సోదరికి చెప్పానని, అయితే ఆమె నమ్మలేదని అందులో పేర్కొంది.

మరోవైపు, దక్షిణాఫ్రికాలోని పలు ప్రాంతాల్లో బుధవారం ఉదయం 8 గంటల సమయంలో ఆకాశంలో కనిపించిన ఆకుపచ్చ రంగు కాంతికి సంబంధించిన ఫొటోలు, వీడియోలు సోషల్‌ మీడియాలో వైరల్‌ అయ్యాయి. దీంతో నెటిజన్లు పలు విధాలుగా కామెంట్లు చేశారు. ‘ఏలియన్లు వచ్చేశాయి. అవి దాడి చేస్తున్నాయి’ అని ఒకరు కామెంట్‌ చేశారు.