ఉదయం చదువు… సాయంత్రం ఉద్యోగం.. స్ఫూర్తిదాయకం ఈ చిన్నోడి ఆరాటం

ఆటుపోట్లను ఎదుర్కోవడం ఎలా అనేది చిన్నప్పటి నుంచే నేర్చుకున్న వారు పెద్దయ్యాక గొప్పగా ఉంటారని మన పెద్దలు చెప్తుంటారు. అలా ఎందరికో స్ఫూర్తిదాయకంగా నిలుస్తున్నాడు ఈ ఏడేండ్ల ఫుడ్‌ డెలివరీ బాయ్‌.

వయసు చిన్నదైనా కొందరు మనకు స్ఫూర్తిదాయకంగా నిలుస్తుంటారు. జీవితం మనకు పోరాట పటిమను నేర్పిస్తుంది. ఆటుపోట్లను ఎదుర్కోవడం ఎలా అనేది చిన్నప్పటి నుంచే నేర్చుకున్న వారు పెద్దయ్యాక గొప్పగా ఉంటారని మన పెద్దలు చెప్తుంటారు. అలా ఎందరికో స్ఫూర్తిదాయకంగా నిలుస్తున్నాడు ఈ ఏడేండ్ల ఫుడ్‌ డెలివరీ బాయ్‌.

ఆహార పదార్థాలను చేరవేసే సంస్థల్లో ఎందరో డెలివరీ బాయ్‌లుగా పనిచేస్తుండటం మనం చూస్తున్నాం. అయితే, కుటుంబ పెద్ద అనారోగ్యం పాలైన సందర్భంలో ఆయన బాధ్యతను తలకెత్తుకున్నాడీ కుర్రోడు. ఉదయం వేళ బుద్ధిగా స్కూల్‌కెళ్లి చదువుకుంటారు. సాయంత్రం వేళ జొమాటో డెలివరీ బాయ్‌గా పనిచేస్తూ కుటుంబానికి చేదోడుగా నిలుస్తున్నాడు. ఈ బాయ్‌ కథనాన్ని వీడియోగా తీసి రాహుల్‌ మిట్టల్‌ అనే వ్యక్తి తన ట్విట్టర్‌ పేజీలో పోస్ట్‌ చేశాడు. ఈ వీడియోను కేవలం నాలుగు రోజుల వ్యవధిలో 40 వేల మంది వీక్షించారు.

తండ్రి ఓ ప్రమాదానికి గురై మంచం పైనుంచి లేవలేని స్థితిలో ఉండగా.. ఆయన బాధ్యతల్లో కొంత తన భుజంపై వేసుకున్నాడు ఈ ఏడేండ్ల చిన్నోడు. ఉదయం పూట స్కూల్‌కెళ్లి చదువుకుంటానని, సాయంత్రం 6 గంటల నుంచి రాత్రి 11 గంటల వరకు జొమాటో డెలివరీ బాయ్‌గా పనిచేస్తున్నట్లు రాహుల్‌ మిట్టల్‌ పోస్ట్‌ చేసిన వీడియోలో పిల్లోడు చెప్పుకొచ్చాడు.

ఈ వీడియోను వీక్షించిన పలువురు నెటిజెన్లు ఎమోషనల్‌గా ఫీలవుతూ.. ఈ కుర్రోడు మనకందరికీ స్ఫూర్తిదాయకం అని కామెంట్ చేశారు. చాలా మంది ఈ బాలుడికి సహాయం చేసేందుకు ముందుకు వచ్చారు. ఇలా చిన్న పిల్లాడితో సేవలు చేయించుకోవడానికి బదులుగా.. ఆయన చదువుకు సాయం చేయడానికి జొమాటలో ముందుకు రావాలని రాహుల్‌ మిట్టల్‌ సూచిస్తున్నాడు. నిజమే కదా! చైల్డ్‌ లేబర్‌ అపవాదు రాకముందే జొమాటో చర్యలు తీసుకుంటుందని ఆశిద్దాం.