కాంగ్రెస్ సీనియ‌ర్ నేత ఎమ్మెస్సార్ క‌న్నుమూత‌

ఎమ్మెస్సార్| కాంగ్రెస్ పార్టీ సీనియ‌ర్ నేత‌, మాజీ మంత్రి ఎం స‌త్య‌నారాయ‌ణ రావు (87) క‌న్నుమూశారు. కొంత‌కాలంగా అనారోగ్యంతో బాధ‌ప‌డుతున్న ఆయ‌న హైద‌రాబాద్‌లోని నిమ్స్ ద‌వాఖాన‌లో చికిత్స పొందుతున్నారు.

హైదరాబాద్‌: కాంగ్రెస్ పార్టీ సీనియ‌ర్ నేత‌, మాజీ మంత్రి ఎం స‌త్యనారాయ‌ణ రావు (87) క‌న్నుమూశారు. కరోనా బారినపడిన ఎమ్మెస్సార్‌ హైద‌రాబాద్‌లోని నిమ్స్ ద‌వాఖాన‌లో చికిత్స పొందుతున్నారు. ప‌రిస్థితి విష‌మించ‌డంతో మంగళవారం తెల్లవారుజామున 3.45 గంట‌ల‌కు తుదిశ్వాస‌విడిచారు. ఎమ్మెస్సార్‌ ఉమ్మడి ఆంధ్రప్రదేశ్‌లో ఆర్టీసీ చైర్మన్‌గా, దేవాదాయ, క్రీడ‌, సినిమాటోగ్రఫీ శాఖ‌ల మంత్రిగా పనిచేశారు. ఉమ్మడి రాష్ట్రంలో విలక్షణ నేతగా గుర్తింపు పొందారు.

1969 ప్రత్యేక తెలంగాణ పోరాటంలో ఎమ్మెస్సార్‌ కీలకపాత్ర పోషించారు. 1971లో తెలంగాణ ప్రజాసమితి తరఫున లోక్‌సభకు ఎన్నికయ్యారు. అనంతరం కాంగ్రెస్‌ పార్టీలో చేరిన ఆయన.. 1980-83 వ‌ర‌కు ఏఐసీసీ ప్రధాన కార్యద‌ర్శిగా ప‌నిచేశారు. 1985-88 వరకు సుప్రీంకోర్టులో సీనియర్‌ కౌన్సిల్‌గా బాధ్యతలు నిర్వహించారు.

1990-94 వ‌ర‌కు రెండుసార్లు ఏపీఎస్‌ ఆర్టీసీ చైర్మన్‌గా ఉన్నారు. 2000-04 వ‌ర‌కు పీసీసీ అధ్యక్షుడిగా పనిచేశారు. 2004లో క‌రీంన‌గ‌ర్ నుంచి శాస‌న‌స‌భ‌కు ఎన్నిక‌య్యారు. 2004-07 వ‌ర‌కు సీఎం వైఎస్ రాజ‌శేఖ‌ర‌ రెడ్డి మంత్రివ‌ర్గంలో మంత్రిగా ప‌నిచేశారు. 2006లో టీఆర్ఎస్ అధినేత కేసీఆర్‌తో స‌వాల్ చేసి క‌రీంన‌గ‌ర్‌ లోక్‌స‌భ ఉపఎన్నిక‌కు కార‌ణ‌మ‌య్యారు. ఆ ఎన్నికల్లో కేసీఆర్‌ భారీ మెజార్టీతో గెలుపొందడంతో ఎమ్మెస్సార్‌ తన మంత్రిపదవికి రాజీనామా చేశారు.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి

ఇవికూడా చదవండి..

ఊపిరులూదినా.. ప్రాణం నిలువలే!

50 ఏండ్లు పనిచేసిన దవాఖానలో వెంటిలేటర్‌ దొరక్క వైద్యుడి మృతి

కరోనాకు ‘పొగ’!

ఇంటికి ఎవర్నీ రానివ్వొద్దు!