కరెంట్‌ కోతలపై గిరిజనుల కన్నెర్ర

మెదక్‌ జిల్లా అల్లాదుర్గం మండలం గొల్లకుంట తండాలో నెల రోజులుగా విద్యుత్తు కోతలు విధిస్తుండటంతో గిరిజనులు మండిపడుతున్నారు.

• సబ్‌స్టేషన్‌ ఎదుట బైఠాయింపు
• మెదక్‌ జిల్లా అల్లాదుర్గంలో ఘటన
• పెద్దపల్లి జిల్లా మంథనిలో మహిళల ధర్నా

అల్లాదుర్గం/మంథని, జూలై 13 : మెదక్‌ జిల్లా అల్లాదుర్గం మండలం గొల్లకుంట తండాలో నెల రోజులుగా విద్యుత్తు కోతలు విధిస్తుండటంతో గిరిజనులు మండిపడుతున్నారు. కరెంట్‌ సమస్యను పరిష్కరించాలని పలుమార్లు అధికారులతో మొరపెట్టుకున్నా పట్టించుకోక పోవడంతో శనివారం అల్లాదుర్గం సబ్‌స్టేషన్‌ ఎదుట 161వ జాతీయ రహదారిపై బైఠాయించారు. దాదాపు అరగంటపాటు రహదారిపై ట్రాఫిక్‌ అంతరాయం ఏర్పడింది.

ఈ సందర్భంగా తండా వాసులు మాట్లాడుతూ.. రెప్పపాటు కరెంట్‌ కోతలు ఉండకూడదని ప్రభుత్వ ఆదేశాలను విద్యుత్తు అధికారులు బేఖాతరు చేస్తున్నారని మండిపడ్డారు. గొల్లకుంట తండాలో నెల రోజులుగా విద్యుత్తు కోతలు విధిస్తున్నారని, రాత్రిపూట కూడా కరెంట్‌ సరఫరాలో అంతరాయం కలుగుతుండటంతో దొంగతనాలు జరుగుతున్నాయని ఆందోళన వ్యక్తం చేశారు. ఏఎస్సై దేవిదాస్‌ వచ్చినా సముదాయించినా భీష్మించుకు కూర్చున్నారు. వెంటనే ఆయన విద్యుత్తు అధికారులతో ఫోన్‌లో మాట్లాడగా ఆయన హామీ మేరకు ఆందోళన విరమించారు.

మంథనిలో కాకరపల్లి మహిళల ధర్నా
విద్యుత్తు సరఫరా నిలిపి వేశారంటూ పెద్దపల్లి జిల్లా మంథని మండలం కాకర్లపల్లికి చెందిన దళిత మహిళలు ఆందోళనకు దిగారు. శనివారం మంథని పట్టణంలోని అంబేద్కర్‌ చౌరస్తాలో ధర్నా చేశారు. ఈ సందర్భంగా వారు మాట్లాడుతూ.. దళిత కాలనీకి చెందిన తమకు కరెంట్‌ మీటర్లు లేవని, తీగల ద్వారా విద్యుత్తును తీసుకుంటున్నామని తెలిపారు. అధికారులు దౌర్జన్యంగా కరెంట్‌ తీగలను ఇష్టంవచ్చినట్టు కట్‌ చేశారని మండిపడ్డారు. ఏఈ రాజమల్లయ్యను స్పందిస్తూ.. కాకర్లపల్లిలోని ఎస్సీ కాలనీ వాసులకు విద్యుత్తు మీటర్లు లేవని అన్నారు. అక్రమంగా విద్యుత్తు వాడుకుంటున్నందున తమ సిబ్బంది వెళ్లి తీగలను తొలగించారని, ఎవరితోనూ దురుసుగా ప్రవర్తించలేదని స్పష్టంచేశారు.