హైదరాబాద్, సెప్టెంబర్ 27(నమస్తే తెలంగాణ) : జర్మనీ దేశంలో వివిధ వృత్తులు చేపట్టేందుకు అవసరమైన శిక్షణను బుధవారం నేషనల్ అకాడమీ ఆఫ్ కన్స్ట్రక్షన్ (న్యాక్)లో తెలంగాణ ఓవర్సీస్ మ్యాన్పవర్ కంపెనీ లిమిటెడ్ (టామ్కామ్) ప్రారంభించింది. ఈ శిక్షణ తరగతుల ప్రారంభ కార్యక్రమానికి ప్రభుత్వ ప్రత్యేక ప్రధానకార్యదర్శి రాణికుముదిని, జర్మనీ కౌన్సిల్ జనరల్ మైఖేలా కుచ్లర్ హాజరయ్యారు. శిక్షణ కోసం 62 మంది అభ్యర్థులను ఎంపికచేశారు. వీరికి జర్మనీ భాష, అక్కడి సంస్కృతీ సాంప్రదాయాలతోపాటు వృత్తి నైపుణ్యంలో శిక్షణ ఇస్తారు. శిక్షణ పూర్తయ్యాక రెండు-మూడేండ్లు అప్రెంటిస్షిప్ కల్పించి, తరువాత ఉద్యోగాలిస్తారు. రాణికుముదిని మాట్లాడుతూ, విదేశాల్లో ఉద్యోగాలకు వెళ్లేవారు సురక్షితంగా తమ వృత్తి బాధ్యతలను నిర్వర్తించేందుకు ప్రభుత్వం టామ్కామ్ ఆధ్వర్యంలో తగిన చర్యలు తీసుకొంటున్నదని తెలిపారు.