Dengue vaccine | హైదరాబాద్ సిటీబ్యూరో, ఆగస్టు 26 (నమస్తే తెలంగాణ): లైఫ్ సైన్సెస్ రంగంలో హైదరాబాద్ దూకుడు తగ్గడం లేదు. ప్రపంచ దేశాలకు కరోనా వ్యాక్సిన్ అందించిన ఘనతను సొంతం చేసుకోగా, తాజాగా డెంగీ జ్వరానికి విరుగుడు హైదరాబాద్ వేదికగా తయారు కానున్నది. ఏడాది కాలంగా ఐసీఎంఆర్ ఆధ్వర్యంలో డెంగీ వ్యాక్సిన్ తయారీపై పరిశోధనలు జరుగుతుండగా, దేశంలోని పలు వ్యాక్సిన్ తయారీ సంస్థలతోపాటు హైదరాబాద్ కేంద్రంగా వ్యాక్సిన్లను ఉత్పత్తి చేసే సంస్థ ముందుకు వచ్చింది. వ్యాక్సిన్ తయారీ అధ్యయనాలు చేసేందుకు సీరం ఇన్స్టిట్యూట్, పాన్ ఏషియా బయోటెక్తోపాటు ఇండియన్ ఇమ్యూనోలాజికల్ లిమిటెడ్ (ఐఐఎల్) అర్హత సాధించింది. 2021-22 వరకు ఏటా కేసులు 21శాతం పెరుగుతున్నట్టు జాతీయ వ్యాధుల నియంత్రణ కేంద్రం గణాంకాలు చెబుతున్న నేపథ్యంలో వ్యాక్సిన్ తయారీ అత్యంత కీలకంగా మారింది.
2026 నాటికి వ్యాక్సిన్ సిద్ధం
అమెరికాకు చెందిన నేషనల్ ఇన్స్టిట్యూట్ ఆఫ్ హెల్త్ సంస్థ సహకారంతో ఐఐఎల్ వ్యాక్సిన్ తయారు చేస్తున్నది. ఇప్పటికే ఓ దఫా ట్రయల్స్ నిర్వహించామని ఐఐఎల్ ఎండీ కే ఆనంద్కుమార్ వెల్లడించారు. 18-50 ఏండ్ల మధ్య వయసు వారితో తొలి దఫా వ్యాక్సిన్ ట్రయల్స్లో మెరుగైన ఫలితాలు వచ్చినట్టు తెలిపారు. తొలి దఫా ట్రయల్స్ పూర్తి కావాల్సి ఉందని, వచ్చే రెండేండ్లలో మరోసారి ట్రయల్స్ నిర్వహించి, ఫలితాల ఆధారంగా పూర్తిస్థాయిలో వ్యాక్సిన్ తయారీపై దృష్టి పెడతామని వివరించారు. 2026 నాటికి బహిరంగ మార్కెట్లోకి వ్యాక్సిన్ అందుబాటులోకి వస్తుందని వెల్లడించారు. మ్యూటేషన్లను తట్టుకునేలా వ్యాక్సిన్ రూపకల్పనపై దృష్టి సారించినట్టు తెలిపారు. డెంగీ వ్యాక్సిన్ తయారీతో అంతర్జాతీయ స్థాయిలో హైదరాబాద్ మరో ఘనత సాధిస్తుందని ఐఐఎల్ వర్గాలు చెబుతున్నాయి.