ఆగమేఘాల మీద పైప్‌లైన్‌కు మరమ్మతులు

కొడంగల్‌లో తాగునీటి కోసం ప్రజలు పడుతున్న కష్టాలపై ‘నమస్తే తెలంగాణ’లో బుధవారం ‘సీఎం నియోజకవర్గంలో రోడ్డెక్కిన మహిళలు’ శీర్షికన ప్రచురితమైన ఫొటోవార్తకు అధికారులు తక్షణమే స్పందించారు.

• సీఎం ఇలాకాలో రోడ్డెక్కిన మహిళలు
• సింగిల్‌ఫేజ్‌ మోటర్‌కు స్టార్టర్‌బిగింపు

మద్దూర్‌ (కొత్తపల్లి), ఏప్రిల్‌ 3 : కొడంగల్‌లో తాగునీటి కోసం ప్రజలు పడుతున్న కష్టాలపై ‘నమస్తే తెలంగాణ’లో బుధవారం ‘సీఎం నియోజకవర్గంలో రోడ్డెక్కిన మహిళలు’ శీర్షికన ప్రచురితమైన ఫొటోవార్తకు అధికారులు తక్షణమే స్పందించారు. నారాయణపేట జిల్లా కొత్తపల్లి మండలం వాల్యానాయక్‌ తండాలో ప్రధాన పైప్‌లైన్‌ మరమ్మతులకు నోచుకోవడంలేదని ‘నమస్తే తెలంగాణ’ వెలుగులోకి తీసుకొచ్చింది. ఈ క్రమంలో బుధవారం మిషన్‌ భగీరథ అధికారులు హుటాహుటిన తండాకు చేరుకొని పైప్‌లైన్‌ మరమ్మతులు చేపట్టారు.

గ్రామంలోని సింగిల్‌ఫేజ్‌ మోటర్‌కు సంబంధించి స్టార్టర్‌ను బిగించారు. అంతేగాక మద్దూర్‌ ఎంపీడీవో కార్యాలయంలో తాగునీటి సమస్యపై పంచాయతీ సెక్రటరీ, ప్రత్యేక అధికారులతో కొడంగల్‌ డెవలప్‌మెంట్‌ ఏరియా ప్రత్యేక అధికారి వెంకట్‌రెడ్డి సమీక్ష నిర్వహించారు. ఈ సందర్భంగా వెంకట్‌రెడ్డి మాట్లాడుతూ.. మద్దూర్‌ మండలంలో ఎక్క డా తాగునీటి సమస్యలు తలెత్తకూడదని ఆదేశించారు. పాత బోర్లకు వెంటనే మరమ్మతులు చేయించాలని సూచించారు. ఎస్డీఎఫ్‌ నిధులతో వేయించిన బోర్లల్లో వెంటనే మోటర్లు దింపాలని, 24 గంటల్లో సమస్యలను పరిష్కరించాలని ఆదేశించారు.