మరోసారి ధాన్యం వేలం.. 16.93 లక్షల టన్నుల వేలానికి నిర్ణయం

మరోసారి ధాన్యం విక్రయించేందుకు పౌరసరఫరాల సంస్థ నిర్ణయించింది. యాసంగికి సంబంధించిన 16.93 లక్షల టన్నుల ధాన్యం వేలం వేసేందుకు నోటిఫికేషన్‌ జారీ చేసింది.

హైదరాబాద్‌, అక్టోబర్‌ 26 (నమస్తే తెలంగాణ) : మరోసారి ధాన్యం విక్రయించేందుకు పౌరసరఫరాల సంస్థ నిర్ణయించింది. యాసంగికి సంబంధించిన 16.93 లక్షల టన్నుల ధాన్యం వేలం వేసేందుకు నోటిఫికేషన్‌ జారీ చేసింది. కనీస ధరను టన్నుకు రూ. 23,890గా నిర్ణయించింది. మొత్తం 290 లాట్స్‌లో ధాన్యాన్ని వేలం వేయనున్నది. ఈ నెల 29వ తేదీన వేలం ప్రక్రియను నిర్వహించనున్నది.

అయితే ఇప్పటికే రబీ ధాన్యం వేలం వేయగా బిడ్డర్ల నుంచి స్పందన రాకపోవడంతో గత టెండర్‌ను రద్దు చేసింది. గత నెల 11.72 లక్షల టన్నులు వేలం వేయగా కేవలం 63 వేల టన్నులు మాత్రమే అమ్ముడుపోయాయి. మిగిలిన ధాన్యం కొనుగోలుకు వ్యాపారులు, మిల్లర్లు ఎవరూ ముందుకు రాలేదు. దీంతో ఆ టెండర్‌ను రద్దు చేసి ఇప్పుడు మరోసారి టెండర్‌ వేయాలని నిర్ణయించింది. ఇప్పుడైనా వ్యాపారులు ముందుకొస్తారా లేదా అనేది ప్రశ్నగా మారింది.