Dhanush | మమ్ముట్టిపై నా అభిప్రాయం పూర్తిగా మారిపోయింది.. మెగాస్టార్‌పై ధనుష్ ప్రశంసలు!

Mammootty | సినీ రంగంలో ప్రయాణం ఎన్నో విచిత్రమైన అనుభవాలను పంచుతుంది. ముఖ్యంగా దిగ్గజ నటులను మొదటిసారి కలిసినప్పుడు కొందరి ప్రవర్తనను సరిగ్గా అంచనా వేయలేక కొన్ని అపార్థాలు ఏర్పడుతుంటాయి.

Dhanush | సినీ రంగంలో ప్రయాణం ఎన్నో విచిత్రమైన అనుభవాలను పంచుతుంది. ముఖ్యంగా దిగ్గజ నటులను మొదటిసారి కలిసినప్పుడు కొందరి ప్రవర్తనను సరిగ్గా అంచనా వేయలేక కొన్ని అపార్థాలు ఏర్పడుతుంటాయి. అయితే, వారితో ఎక్కువ కాలం పనిచేసే అవకాశం వచ్చినప్పుడు ఆ తొందరపాటు అభిప్రాయాలు పూర్తిగా తలకిందులవుతుంటాయి. సరిగ్గా ఇలాంటి ఓ ఆసక్తికరమైన అనుభవాన్ని ప్రముఖ కోలీవుడ్ నటుడు ధనుష్ తాజాగా పంచుకున్నారు. మలయాళ మెగాస్టార్ మమ్ముట్టిని తాను మొదట్లో ఎలా భావించానో, ఇప్పుడు ఆయనపై తన అభిప్రాయం ఎంతగా మారిందో వెల్లడించారు.

ధనుష్, మమ్ముట్టి గతంలో 2013లో విడుదలైన మలయాళ చిత్రం ‘కమ్మత్ అండ్ కమ్మత్‌’లో తొలిసారి కలిసి నటించారు. ఈ సినిమా ద్వారానే ధనుష్ మలయాళ చిత్ర పరిశ్రమలోకి ఎంట్రీ ఇచ్చారు. అయితే, ఆ చిత్రంలో ఆయనది కేవలం అతిథి పాత్ర మాత్రమే కావడంతో.. మమ్ముట్టితో కలిసి పనిచేసే అవకాశం కేవలం రెండే రెండు రోజులు మాత్రమే దక్కింది. ఆ కొద్దిపాటి పరిచయం వల్ల మమ్ముట్టి ప్రవర్తన తనకు కాస్త రూడ్‌గా, గంభీరంగా అనిపించిందని ధనుష్ గుర్తుచేసుకున్నారు. అప్పట్లో ఆయన వ్యక్తిత్వంపై తన మనసులో ఒక చిన్న అపార్థం అలాగే ఉండిపోయిందని తెలిపారు. అయితే, దర్శకుడు రాజ్‌కుమార్ పెరియసామి తెరకెక్కిస్తున్న ప్రతిష్టాత్మక సినిమా ‘ఓం’ కోసం ఈ ఇద్దరూ తాజాగా మరోసారి జతకట్టారు. ఈ ప్రాజెక్ట్ కారణంగా మమ్ముట్టితో ఎక్కువ సమయం గడిపే అవకాశం ధనుష్‌కు లభించింది. సెట్స్‌లో కేవలం మూడు రోజులు కలిసి పనిచేసిన అనుభవంతో మమ్ముట్టిపై తనకు గతంలో ఉన్న అభిప్రాయం పూర్తిగా మారిపోయిందని ధనుష్ ఆశ్చర్యంతో చెప్పారు.

ఈ సందర్భంగా ధనుష్ మాట్లాడుతూ.. ‘‘ఈ సినిమా షూటింగ్ కోసం మళ్లీ ఆయనను కలిశాను. మూడు రోజుల పాటు ఆయనతో కలిసి పనిచేసిన తర్వాతే మమ్ముట్టి ఎంత మంచివాడో నాకు అర్థమైంది. ఆయన బయటికి కనిపించేలా కఠినంగా ఉండరు. నిజానికి ఆయన చాలా ఆప్యాయంగా, ఎంతో వినయంగా, నిరాడంబరంగా ఉంటారు. ఎదుటివారికి సహాయం చేయాలనే మంచి మనస్తత్వం ఆయనది. షూటింగ్ సెట్‌లో అందరితోనూ ఎంతో సరదాగా ఉంటారు. మమ్ముట్టి సర్ అంటేనే అసలైన ‘థగ్ లైఫ్’’ అంటూ ఆయన్ని ఆకాశానికెత్తారు. అంతేకాదు, మమ్ముట్టి వ్యక్తిత్వాన్ని మరింత లోతుగా తెలుసుకోవడానికి ఆయన ఇచ్చిన పలు ఇంటర్వ్యూలను కూడా తాను చూశానని ధనుష్ వెల్లడించారు. ఇక ఈ క్రేజీ కాంబినేషన్‌లో వస్తున్న ‘ఓం’ సినిమా నవంబర్‌ 20న ప్రేక్షకుల ముందుకు రానుంది. ఈ దిగ్గజ నటులద్దరూ కలిసి తెరపై ఎలాంటి మాయ చేయబోతున్నారనే దానిపై సినీ వర్గాల్లో మరియు ప్రేక్షకుల్లో భారీ అంచనాలు నెలకొన్నాయి.