హైదరాబాద్, మే 7 (నమస్తే తెలంగాణ): ఉద్యోగాల కల్పనలో మహిళలకు సముచిత గౌరవం కల్పించే రాష్ట్రంగా తెలంగాణ దేశంలోనే సమున్నత స్థానంలో నిలిచింది. మహిళ ఉపాధిలో టాప్-5 రాష్ర్టాల్లో చోటు దక్కించుకొన్నది. అత్యధిక మహిళా ఉద్యోగినులున్న రాష్ర్టాల్లో మేఘాలయ, మణిపూర్ తరువాత తెలంగాణ దేశంలోనే మూడోస్థానంలో నిలిచింది. జాతీయ కుటుంబ ఆరోగ్య సర్వే (ఎన్ఎఫ్హెచ్) తాజాగా విడుదల చేసిన ఐదో ఎడిషన్ ఈ విషయాన్ని వెల్లడించింది.
మహిళ సాధికారత కోసం కృషి చేస్తూ ఆర్థిక వృద్ధిలో మహిళలను భాగస్వాములు చేసేందుకు ప్రయత్నిస్తున్న రాష్ర్టాల్లో స్త్రీలకు ఉద్యోగ అవకాశాలు ఎక్కువగా లభిస్తున్నట్టు సర్వే పేర్కొన్నది. ఎన్ఎఫ్హెచ్ ఎడిషన్-4 సర్వేతో పోలిస్తే మహిళ ఉద్యోగాల్లో మహిళల వాటా ఏ మాత్రం పెరగలేదు. అప్పుడు 24 శాతం ఉంటే ఇప్పుడూ అదే 25 శాతమే ఉన్నది. దేశంలో పురుషులతో పాటు మహిళలకు సమాన అవకాశాలు కల్పించడంలో 11 రాష్ర్టాలు మాత్రమే మెరుగైన స్థితిలో ఉన్నాయి.
దేశంలో మహిళా ఉద్యోగుల కంటే మూడు రెట్లు ఎక్కువగా పురుష ఉద్యోగులు ఉన్నారు. ఈ సర్వే ప్రకారం భారత్లో 15 నుంచి 49 సంవత్సరాల మధ్య వయసున్న పురుషుల్లో 75 శాతం మంది ఉద్యోగులు ఉండగా, స్త్రీలలో 25 శాతం మాత్రమే ఉన్నారు. మరో ఆసక్తికరమైన విషయం ఏమిటంటే తక్కువ చదువుకున్న వారికి ఉపాధి లభ్యత ఎక్కువగా ఉన్నది. ఐదో తరగతి కంటే తక్కువ చదువుకున్న పురుషుల్లో 89 శాతం, మహిళలలో 34 శాతం ఉపాధి కలిగి ఉన్నారు. అసలే చదువుకోని పురుషులు 87 శాతం, మహిళలు 34 శాతం ఉపాధి కలిగి ఉండటం గమనార్హం.