నిమ్స్‌ డిప్యూటీ రిజిస్ట్రార్‌కు వేతనాలు చెల్లించాలి

నిమ్స్‌ డిప్యూటీ రిజిస్ట్రార్‌గా పనిచేసిన ఉద్యోగికి నిర్బంధ ఉద్యోగ విరమణ విధించినప్పటి నుంచి తిరిగి విధుల్లోకి తీసుకునే వరకు మధ్య కాలాన్ని సర్వీసుగా పరిగణించి వేతన బకాయిలు చెల్లించాలన్న సింగిల్‌ జడ్జి ఉత్తర్వులను హైకోర్టు సమర్థించింది.

• అప్పీల్‌ను కొట్టివేసిన హైకోర్టు

హైదరాబాద్‌, నవంబర్‌ 14 (నమస్తే తెలంగాణ): నిమ్స్‌ డిప్యూటీ రిజిస్ట్రార్‌గా పనిచేసిన ఉద్యోగికి నిర్బంధ ఉద్యోగ విరమణ విధించినప్పటి నుంచి తిరిగి విధుల్లోకి తీసుకునే వరకు మధ్య కాలాన్ని సర్వీసుగా పరిగణించి వేతన బకాయిలు చెల్లించాలన్న సింగిల్‌ జడ్జి ఉత్తర్వులను హైకోర్టు సమర్థించింది. ఈ ఉత్తర్వులను సవాల్‌ చేస్తూ నిమ్స్‌ దాఖలు చేసిన అప్పీల్‌ను ధర్మాసనం కొట్టివేసింది.

నిమ్స్‌లో డిప్యూటీ రిజిస్ట్రార్‌గా పనిచేసిన వినోద్‌కుమార్‌ ఉన్నతాధికారులను తప్పుదోవ పట్టించి లీగల్‌ అసిస్టెంట్‌కు వేతన సేలు పెంచినట్టు ఆరోపణలు రావడంతో ఆయనకు చార్జిమెమో జారీ చేసి నిర్బంధ ఉద్యోగ విరమణ విధించారు. అనంతరం ఉద్యోగ విరమణ ప్రయోజనాల కల్పన కోసం 2006లో తిరిగి విధుల్లోకి తీసుకున్నారు. నిర్బంధ పదవీ విరమణ నుంచి పునర్నియామకం వరకు ఉన్న కాలానికి వేతన బకాయిలు చెల్లించకపోవడంతో ఆయన హైకోర్టును ఆశ్రయించారు.