యాంజియోగ్రామ్‌ కన్నా ఐవస్‌ మేలు

• గుండె బ్లాకులను సులభంగా గుర్తించే సాంకేతికత
• కార్డియాలజిస్టు బాలాజీ వెల్లడి

హైదరాబాద్‌ సిటీబ్యూరో, డిసెంబరు 3 (నమస్తే తెలంగాణ): యాంజియోగ్రామ్‌తో గుర్తించలేని 30 శాతంలోపు తీవ్రత కలిగిన చిన్న బ్లాకులను ఇంట్రావ్యాస్కులర్‌ అల్ట్రా సౌండ్‌-ఓసీటీ (ఐవస్‌-ఓసీటీ) ద్వారా సులభంగా గుర్తించవచ్చునని మెడికవర్‌ హాస్పిటల్‌ కార్డియాలజిస్టు డాక్టర్‌ బాలాజీ తెలిపారు. సీఎస్‌ఐ సదస్సు సందర్భంగా ‘నమస్తే తెలంగాణ’తో మాట్లాడుతూ, అన్నిరకాల చిన్నపాటి బ్లాక్‌ల వల్ల గుండెపోటు రాదని, కొన్నిరకాల చిన్నపాటి బ్లాక్‌లు గుండెపోటుకు దారితీస్తాయని చెప్పారు. ఈ ‘వల్నరబుల్‌’ బ్లాక్‌లను యాంజియోగ్రామ్‌లు గుర్తించకపోవడంతో రోగి అకస్మాతుగా గుండెపోటుకు గురయ్యే ప్రమాదం ఉంటుందని అన్నారు. ఈ ముప్పును అధిగమించడంలో ఐవస్‌-ఓసీటీ కీలక పాత్ర పోషిస్తుందని వివరించారు. 1 ఎం.ఎం. పరిమాణం గల చిన్నపాటి ఐవస్‌ యంత్రాన్ని రక్తనాళాల్లోకి పంపించి క్షుణ్ణంగా పరిశీలిస్తారు. ఈ పరికరంలో చిన్నపాటి కెమెరా ఉండడం వల్ల రక్తనాళాలను స్పష్టంగా చూస్తూ గుండెపోటుకు దారితీసే బ్లాక్‌లను ముందుగానే గుర్తించవచ్చునని, రోగిని అప్రమత్తం చేయడంతో పాటు ముందస్తు చికిత్స ప్రారంభించవచ్చునని డాక్టర్‌ బాలాజీ అన్నారు.