శ్రీశైలం @ డేంజర్‌ బెల్స్‌

తెలుగు రాష్ర్టాల జీవనాడి శ్రీశైలం జలాశయంలో నీటి నిల్వలు వేగంగా పడిపోతున్నాయి. ఈ ఏడాది ఎల్‌ నినో ప్రభావంతో వర్షాలు కురవకపోవడం, ఎగువ నుంచి వరద ప్రవాహం లేకపోవడం, రెండు రాష్ర్టాల విద్యుదుత్పత్తి, సాగునీటి వినియోగం పెరగడంతో జలాశయం కళ తప్పుతున్నది. వారం రోజుల్లోనే 19.51 టీఎంసీల నీరు ఆవిరైపోయిందని అధికారుల లెక్కలు చెప్తున్నాయి.

నాగర్‌కర్నూల్‌, సెప్టెంబర్‌ 21 : తెలుగు రాష్ర్టాల జీవనాడి శ్రీశైలం జలాశయంలో నీటి నిల్వలు వేగంగా పడిపోతున్నాయి. ఈ ఏడాది ఎల్‌ నినో ప్రభావంతో వర్షాలు కురవకపోవడం, ఎగువ నుంచి వరద ప్రవాహం లేకపోవడం, రెండు రాష్ర్టాల విద్యుదుత్పత్తి, సాగునీటి వినియోగం పెరగడంతో జలాశయం కళ తప్పుతున్నది. వారం రోజుల్లోనే 19.51 టీఎంసీల నీరు ఆవిరైపోయిందని అధికారుల లెక్కలు చెప్తున్నాయి.

ఈ నెల 13న 119.49 టీఎంసీలుగా ఉన్న నిల్వలు, 21వ తేదీ నాటికి 99.33 టీఎంసీలకు పడిపోయింది. ఇన్‌ఫ్లో దాదాపు శూన్యస్థాయికి చేరినా, దిగువకు 48 వేల క్యూసెక్కుల వరకు నీటిని విద్యుదుత్పత్తి, కేఎల్‌ఐ, పోతిరెడ్డిపాడు తాగునీటి అవసరాలకు విడుదల చేస్తుండటం వల్ల జలాశయం ఖాళీ అవుతున్నది. ఈ నెల 13న 864.20 అడుగులుగా ఉన్న నీటిమట్టం, ప్రస్తుతం 858 అడుగులకు పడిపోయింది. ఉన్న నీటిని వచ్చే వేసవి వరకు తాగునీటి అవసరాలకోసం వాడుకోవాలని ప్రభుత్వం నిర్ణయించింది.