హనుమకొండ జడ్పీ చైర్మన్‌కు అవమానం

హనుమకొండ జిల్లా భీమదేవరపల్లి మండలం గాంధీనగర్‌లో ఆదివారం జరిగిన అంబేద్కర్‌ విగ్రహావిష్కరణ సభలో జడ్పీ చైర్మన్‌ సుధీర్‌కుమార్‌ అవమానానికి గురయ్యారు. అంబేద్కర్‌ విగ్రహావిష్కరణ కార్యక్రమానికి రవాణా, బీసీ సంక్షేమశాఖ మంత్రి పొన్నం ప్రభాకర్‌తోపాటు జడ్పీ చైర్మన్‌ మారపల్లి సుధీర్‌కుమార్‌ ముఖ్యఅతిథులుగా హాజరయ్యారు.

• మాట్లాడుతుండగా మైకు లాక్కున్న మంత్రి పొన్నం ప్రభాకర్‌
• భీమదేవరపల్లి అంబేద్కర్‌ విగ్రహావిష్కరణలో ఘటన

భీమదేవరపల్లి, జూన్‌ 23: హనుమకొండ జిల్లా భీమదేవరపల్లి మండలం గాంధీనగర్‌లో ఆదివారం జరిగిన అంబేద్కర్‌ విగ్రహావిష్కరణ సభలో జడ్పీ చైర్మన్‌ సుధీర్‌కుమార్‌ అవమానానికి గురయ్యారు. అంబేద్కర్‌ విగ్రహావిష్కరణ కార్యక్రమానికి రవాణా, బీసీ సంక్షేమశాఖ మంత్రి పొన్నం ప్రభాకర్‌తోపాటు జడ్పీ చైర్మన్‌ మారపల్లి సుధీర్‌కుమార్‌ ముఖ్యఅతిథులుగా హాజరయ్యారు. సుధీర్‌కుమార్‌ మాట్లాడుతూ.. గత ప్రభుత్వం 239 ఉన్న ఎస్సీ రెసిడెన్షియల్‌ స్కూళ్లను 1000కి పెంచినట్టుగా తెలిపారు. విద్యార్థుల సంక్షేమం కోసం ఎస్సీ రెసిడెన్షియల్‌ స్కూళ్ల సంఖ్యను మరింత పెంచాల్సిన అవసరం ఉందని అభిప్రాయపడ్డారు. దళితుల అభ్యున్నతి కోసం దళితబంధు పేరిట అప్పటి ప్రభుత్వం ఒక్కో కుటుంబానికి రూ.10 లక్షలు ఇచ్చిందని, ప్రస్తుత ప్రభుత్వం అంబేద్కర్‌ అభయహస్తం కింద దళిత, గిరిజనులకు ఒక్కో కుటుంబానికి రూ.12 లక్షలు ఇవ్వాలని కోరారు. దీంతో పక్కనే ఉన్న మంత్రి పొన్నం ప్రభాకర్‌ కలుగజేసుకుని అంబేద్కర్‌ విగ్రహావిష్కరణ సభలో రాజకీయాలు మాట్లాడొద్దంటూ సుధీర్‌కుమార్‌ చేతిలో నుంచి మైకును లాక్కున్నారు. ఈ విషయంపై వివరణ ఇచ్చేందుకు జడ్పీ చైర్మన్‌ పలుమార్లు మైక్‌ అడిగినా ఇవ్వకపోవడంతో నిరాశతో వెనుదిరిగారు.